Малака ошириш курсининг якуний босқичи бошланди

Бош прокуратура Академиясида аралаш таълим (3+1) шаклида ташкил этилган “Жиноят ишлари бўйича суд муҳокамасида прокурорнинг иштироки” мавзусидаги малака ошириш курсининг якуний босқичи бошланди.

Курснинг масофавий қисмининг оралиқ назорат ва амалий топшириқларини бажариш жараёнида ўтиш баллини тўплаган тингловчилар Академияда аудитория машғулотларида иштирок этадилар.

Таълимнинг бундай аралаш шакли тингловчиларга иш жойидан ажралмаган ҳолда ўқиш, шунингдек масофавий таълим жараёнида олинган билим ва кўникмаларни Академиядаги аудитория машғулотлари жараёнида мустаҳкамлаш имконини беради.

Ўқув машғулотлари таълимнинг интерфаол усулларидан фойдаланган ҳолда муаммоли-вазиятли топшириқлар ва казусларни таҳлил қилиш, уларни ҳал этиш бўйича тренинглар шаклида ташкил этилади.

Бундан ташқари, қонунчилик ва ҳуқуқни қўллаш амалиётини такомиллаштириш бўйича лаборатория ишлари доирасида тингловчиларнинг долзарб масала ва муаммоларни аниқлаш ва таҳлил қилишга қаратилган кўникмалари ўрганилади ҳамда баҳоланади.