Магистратура тингловчилари Х.Сулаймонова номидаги Республика суд экспертизаси маркази фаолияти билан таништирилди.

Жиноят процессининг ажралмас қисми бўлган суд экспертизаси соҳасига татбиқ этилаётган инновациялар, мавжуд экспертиза турларининг хусусияти, шунингдек катта илмий ва амалий тажрибага эга экспертлар фаолияти билан яқиндан танишиш мақсадида Х.Сулаймонова номидаги Республика суд экспертизаси марказига Академия магистратураси тингловчиларининг ташрифи ташкил этилди.

Ташриф давомида Академия тингловчилари Ҳужжатларнинг криминалистик экспертизаси лабораторияси, Суд баллистик ва изшунослик экспертизаси лабораторияси, Материаллар, ашёлар, буюмлар криминалистик экспертизаси лабораторияси, Одам ДНКси суд-биологик экспертизаси лабораторияси, Суд фонография экспертизаси лабораторияси ва улардаги замонавий техник воситалар имкониятлари билан яқиндан танишдилар.

Мутахассислар билан бўлган суҳбат давомида соҳага оид долзарб масалалар, уларни шакллантиришда эътибор қаратиш лозим бўлган ҳолатлар, экспертиза хулосаларини баҳолаш жараёнида йўл қўйилаётган хато ва камчиликлар, уларни бартараф этиш йўллари муҳокама қилинди.

Марказ ходимлари магистратура тингловчиларининг қизиқтирган саволларига жавоб бериш баробарида келгусида ҳам амалиётга йўналтирилган ушбу турдаги ташрифларни ташкил қилинишига тайёр эканини маълум қилдилар.