Магистратура тингловчиларининг Парламентга ташрифи ташкил этилди

Бош прокуратура Академияси магистратура тингловчиларининг Ўзбекистон Республикасининг Олий Мажлиси Сенатига “Прокуратура органларининг қонун ижодкорлигидаги иштироки” модули доирасида ташрифи ташкил этилди.

Ташриф давомида тинловчилар Олий Мажлис Сенатининг Суд-ҳуқуқ масалалари ва коррупцияга қарши курашиш қўмитаси раиси Н.Умаров, раис ўринбосари Ш.Чўллиев ҳамда Ёшлар, маданият ва спорт масалалари қўмитаси раисининг ўринбосари Д.Тошмуҳаммедовалар иштирокидаги “Қонунлар ижросидаги муаммолар” мавзусидаги давра суҳбатида иштирок этдилар. Суҳбат давомида жорий йилда Сенат томонидан кўрилаётган асосий масалалар, халқ вакилларининг қонунларни муҳокама қилиш жараёнидаги фаолияти, қонунлар ижросини таъминлаш бўйича қилинаётган ишлар юзасидан фикр алмашилди.

Бундан ташқари, учрашув давомида қонунлар ижросини таъминлаш, юридик кадрларни тайёрлашда Парламент билан таълим муассасаларининг ўзаро ҳамкорлигини мустаҳкамлаш, қонун ижодкорлиги йўлида назарий билимларни амалиёт билан уйғунлаштиришнинг аҳамияти таъкидланди.

Куннинг иккинчи ярмида тингловчиларнинг Ўзбекистон Республикаси Олий Мажлиси Қонунчилик палатасининг Коррупцияга қарши курашиш ва суд-ҳуқуқ масалалари қўмитаси раиси ўринбосари Ш.Полванов ҳамда депутат Ш.Тухташевлар билан учрашув бўлиб ўтди. Учрашувда депутатлар ва тингловчилар томонидан Ўзбекистон Республикасининг “Маъмурий тартиб-таомиллар тўғрисида”ги Қонуни ва унинг ишлаш механизми кенг муҳокама қилинди.

Тадбир давомида тинловчиларга Парламент палаталари фаолиятининг асосий йўналишлари, ваколатлари ҳамда ҳуқуқ ва мажбуриятлари тўғрисида тушунтиришлар берилди.

Учрашувда тингловчилар ўзларини қизиқтирган саволларга сенатор ва депутатлардан асослантирилган жавоблар олдилар.