Ўзбекистон Республикаси Олий Мажлисининг Инсон ҳуқуқлари бўйича вакили (Омбудсман) билан учрашув ташкил этилди

Бош прокуратура Академияси докторантлари ва магистратура тингловчилари Олий Мажлиснинг Инсон ҳуқуқлари бўйича вакили (Омбудсман)нинг бош офисига ташриф буюрди.

Инсон ҳуқуқлари бўйича вакил Ф.Эшматова докторантлар ва тингловчилар билан ўтказилган учрашувда Омбудсман институтининг асосий фаолият йўналишлари, мурожаатлар билан ишлаш, қийноқларни олдини олиш бўйича мамлакатимизда амалга оширилаётган Миллий превентив механизм, сўнгги йилларда Омбудсман фаолиятига оид қабул қилинган қонун ҳужжатлари ҳамда ушбу институтнинг келгусидаги стратегик режалари ҳақида батафсил маълумотлар берди.

Тадбир давомида докторантлар ва тингловчилар инсон ҳуқуқларининг кафолатланиши борасидаги айрим халқаро институтлар фаолияти, нормалар ҳамда миллий тажриба, шунингдек Олий Мажлиснинг Инсон ҳуқуқлари бўйича вакилининг ўринбосари — Бола ҳуқуқлари бўйича вакили фаолияти ҳақида маълумотларга эга бўлдилар.

Учрашув эркин мулоқот шаклида, савол-жавобларга бой тарзда бўлиб ўтди. Aкадемия докторантлари ва тингловчилари инсон ҳуқуқларини ҳимоя қилиш йўлида амалга ошираётган илмий-тадқиқот ишлари доирасида ўзларини қизиқтирган саволларга атрофлича жавоб олдилар.