Фуқаролик суд ишларини юритишда ягона суд амалиёти

Бош прокуратура Академиясида “Фуқаролик ишларини юритишда ягона суд амалиётини шакллантириш масалалари” мавзусида прокуратура тизими ходимлари учун вебинар ўтказилди.

Вебинарда Бош прокуратура марказий маҳкамасининг ходимлари, Олий суднинг фуқаролик ишлари бўйича судлов ҳайъати судьялари, Судьялар олий кенгаши ҳузуридаги Судьялар олий мактаби ва Адвокатлар палатасининг вакиллари, Бош прокуратура Академиясининг профессор-ўқитувчилари, шунингдек жойлардаги прокуратура органларининг соҳа бўйича ходимлари, Қорақалпоғистон Республикаси, вилоятлар, Тошкент шаҳар судларининг судьялари ва адвокатлар иштирок этди.

Мазкур тадбир фуқаролик суд ишларини юритиш йўналишида мавжуд муаммолар ва тизимли камчиликларни аниқлаш ҳамда амалдаги қонун ҳужжатларини татбиқ этишда ягона ҳуқуқни қўллаш амалиётини шакллантириш борасида тушунтиришлар ва тавсиялар бериш мақсадида ташкил этилди.

Вебинарда никоҳдан ажратиш ва бошқа турдаги оилавий низолар, реабилитация қилинган шахсларни ишга тиклаш, шунингдек прокурор томонидан фуқаролик судига даъво аризалари (аризалар) киритиш тартиби, апелляция ва кассация инстанциясида иш юритиш, фуқаролик ишлари бўйича суд амалиёти ва унинг фуқаролар конституциявий ҳуқуқлари ва эркинликларини таъминлашдаги аҳамияти каби масалалар қизғин муҳокама қилинди.

Тадбирда иштирокчилар ўзларини қизиқтирган саволларга жавоб олдилар ва фуқаролик суд ишларини юритишда ягона амалиётни таъминлаш борасида ўзаро фикр алмашдилар.

Вебинар якунида амалдаги қонунчиликни такомиллаштириш борасида таклифлар берилди.