Илм-фан ютуқларини амалиётга жорий қилиш йўлида

Ўзбекистон Республикаси Бош прокуратураси Академиясида Суд ва ҳуқуқни муҳофаза қилиш фаолияти соҳасида илмий-тадқиқот консорциуми доирасида ташкил этилган “Юридик фан ва ҳуқуқни қўллаш амалиётининг долзарб муаммолари” мавзусидаги илмий-амалий видео-конференциянинг материаллари ўрин олган 2 жилдли тўплам нашрдан чиқди.

Конференция ишида Бош прокуратура Академияси, Судьялар олий мактаби, Тошкент давлат юридик университети, Юристлар малакасини ошириш маркази, Миллий гвардия Ҳарбий-техник институти, Ички ишлар вазирлиги академияси, Божхона институти, Давлат солиқ қўмитасининг малака ошириш маркази, Инсон ҳуқуқлари бўйича Ўзбекистон Республикаси Миллий марказининг ҳуқуқшунос олимлари, докторантлари, мустақил изланувчилари ва амалиётчи-ходимлари фаол иштирок этган эди.

Тўпламнинг 1-жилдида юридик фанларни ривожлантиришнинг долзарб назарий ва ташкилий-амалий масалалари ҳамда юридик фанлар бўйича тадқиқотлар натижаларини амалиётда қўллаш муаммоларига бағишланган мамлакатимизнинг етакчи ҳуқуқшунос олимлари ва амалиёт ходимларининг илмий мақола ва тезислари ўрин олган.  

Мазкур тўпламнинг 2-жилди “Ёш олимлар минбари” рукнига бағишланган бўлиб, унда давлат-ҳуқуқий, фуқаролик-ҳуқуқий, жиноят-ҳуқуқий, халқаро-ҳуқуқий фанлар муаммоларига бағишланган мустақил изланувчи, докторант ва бошқа ёш олимларнинг мақола ва тезислари киритилган.

Ўзбекистон Республикаси Бош прокуратураси Академиясининг расмий сайтига жойлаштирилган ушбу тўпламлар юридик фанга дахлдор бўлган барча олий таълим ва илмий тадқиқот муассасалари, шунингдек ушбу соҳага қизиқувчи китобхонлар учун илмий-амалий қўлланма сифатида хизмат қилади.