Ички ишлар вазирлиги Академияси магистратураси тингловчиларининг Бош прокуратура Академиясига ташрифи ташкил этилди

Бош прокуратура Академиясининг фаолияти, хусусан, магистратура йўналишида амалга оширилиб келинаётган таълим ва илмий-тадқиқот жараёнлари мамлакатимизнинг бошқа олий таълим муассасалари томонидан ижобий баҳоланиб, ўзаро тажриба алмашиш борасида кенг ҳамкорлик қилиб келинмоқда.

Хусусан, ўзаро ҳамкорлик тўғрисидаги Меморандумга мувофиқ ИИВ Академияси магистратураси тингловчиларининг малакавий амалиёти доирасида Бош прокуратура Академиясига танишув ташрифи ташкил этилди.

Тадбир давомида Бош прокуратура Академияси бошлиғининг ўринбосари, юридик фанлари доктори, профессор М.М.Мамасиддиқов томонидан Академиянинг асосий фаолият йўналишлари, жумладан илмий ходимларни тайёрлаш, илмий-тадқиқот ва таҳлилий ишлар борасида бугунги кунда амалга оширилаётган ишлар,  эришилган ютуқлар ҳақида батафсил маълумот берилди.

Жумладан, Бош прокуратура Академиясида ташкил этилган магистратуранинг уникал мутахассисликлар бўйича ўқитиш тизимининг жорий қилинганлиги, назария ва амалиётнинг уйғунлиги, хорижий давлатларнинг нуфузли олий таълим муассасалари экспертларининг таълим жараёнига жалб қилиниши ҳамда талабаларнинг академик мобиллик дастурлари доирасида хорижий таълим муассасаларида ўқиш имконияти мавжудлиги ИИВ Академияси тингловчиларида алоҳида қизиқиш уйғотди.

Учрашув давомида тингловчилардан келиб тушган саволларга батафсил жавоблар берилди.