Прокуратура органларида раҳбарлик лавозимларини эгаллаш учун захирада турган кадрларни касбий қайта тайёрлаш курси бошланди

Академияда Бош прокурорнинг тегишли буйруғи билан тасдиқланган “Бош прокуратура Академиясида прокуратура органларида раҳбарлик лавозимларини эгаллаш учун захирада турган кадрларни касбий қайта тайёрлаш курсига қабул қилиш танловини ўтказиш тартиби”га мувофиқ саралаб олинган 16 нафар прокуратура органлари ходимлари иштирокида раҳбар кадрларни касбий қайта тайёрлаш курси бошланди.

Қайта тайёрлаш курсининг дастури бошқарув ва менежмент асосларини ташкил этишнинг инновацион шакллари ва методларини ўзлаштиришга, прокурор-тергов ва таҳлилий ишларни юритиш, қонун ижодкорлиги фаолиятида иштирок этиш юзасидан касбий билим ҳамда кўникмаларни чуқурлаштиришга, тингловчиларнинг етакчилик фазилатларини мустаҳкамлашга, уларда тегишли бошқарув ва касбий компетенцияларни шакллантиришга қаратилган.

Ушбу қайта тайёрлаш курсининг дастури ҳам мазмунан, ҳам илмий-методик жиҳатдан янгича ёндашувлар асосида, илғор педагогик
ва ахборот технологияларидан, хорижий инновацион тажрибалардан фойдаланган ҳолда ташкил этилган.

Ўқув жараёнига Ўзбекистон Республикаси Президенти Администрацияси, Олий Мажлис Қонунчилик палатаси ва Сенати, “Тараққиёт стратегияси” маркази, Адлия вазирлиги, Ташқи ишлар вазирлиги масъул ходимлари ва бошқа тегишли соҳаларнинг тажрибали мутахассислари жалб этилиши кўзда тутилган.