Жойларда жиноятчилик аҳволини ўрганиш давом этмоқда

Бош прокуратура Академияси томонидан ҳудудларда криминоген вазиятни ўрганиш амалиёти давом этмоқда. Шу мақсадда ҳозирда Бухоро вилоятида жиноятчилик сабабларини ўрганиш вазифаси билан шуғулланувчи эксперт-таҳлил гуруҳлари фаолияти Академия вакиллари томонидан ўрганилмоқда.

Ўрганиш жараёнида эксперт-таҳлил гуруҳининг ҳар бир аъзоси, яъни прокуратура, адлия, ички ишлар, ёшлар ишлари агентлиги, меҳнат, соғлиқни сақлаш, божхона ва солиқ хизмати, нодавлат нотижорат ташкилотлари ҳамда фуқароларнинг ўзини ўзи бошқариш органлари вакиллари билан алоҳида учрашувлар ўтказилмоқда.

Учрашувлар давомида жиноятчилик ўсишига таъсир кўрсатувчи хавф-хатарларнинг олдини олиш ҳамда мавжуд муаммоларни аниқлаш ва уларни бартараф этиш юзасидан таклифлар ишлаб чиқиш бўйича ҳамкорликдаги чора-тадбирлар муҳокама қилинмоқда. Асосий эътибор ҳамжамиятларнинг жиноятчилик ва зўравонликка нисбатан барқарорлигини шаҳар ва қишлоқлар даражасида мустаҳкамлашга, шунингдек, уларнинг кибержиноятчилик, гиёҳванд моддалар, одам савдоси ва контрафакт товарлар савдоси билан шуғулланиш сингари трансмиллий жиноятларга мойиллигини камайтиришга қаратилган янада самарали ва фактик асосларга таянган чора-тадбирларга бўлган заруратга қаратилди.