Қурилиш соҳасидаги давлат дастурлари ижро этилиши устидан прокурор назоратини услубий таъминлаш йўлида

Бош прокуратура Академияси томонидан Қурилиш соҳасида қонунчилик ижроси устидан назорат бўлими билан ҳамкорликда “Қурилиш соҳасидаги давлат дастурлари ижро этилиши устидан назорат” номли услубий қўлланма тайёрланди.

Мазкур қўлланма Ўзбекистон Республикаси Президентининг 2021 йил 10 декабрдаги “Ўзбекистон Республикасининг ижтимоий ва ишлаб чиқариш инфратузилмасини ривожлантириш дастури ҳамда бошқа давлат дастурлари ижроси устидан назоратни кучайтиришга доир қўшимча чора-тадбирлар тўғрисида”ги ПҚ–43-сон қарори ижросига асосан, қурилиш соҳасидаги давлат дастурлари ижро этилишини назорат қилиш ва мувофиқлаштириш бўйича республика, ҳудудий, туман (шаҳар) штаблари ва ишчи гуруҳлари фаолиятини йўналтириш, мавжуд норматив ҳужжатлар мазмуни билан таништириш, назорат қилиш ва мувофиқлаштириш жараёнида ўрганилиши лозим бўлган масалаларни ёритиб бериш орқали услубий таъминлаш мақсадида ишлаб чиқилган.

Шу билан бирга, мазкур қўлланмада қурилиш соҳасидаги назорат объектлари, уларни текшириш тартиби, механизми ва шу каби бошқа масалалар ҳам батафсил ёритилган.

Қўлланмадан қурилиш соҳасидаги давлат дастурлари ижро этилишини назорат қилиш ва мувофиқлаштириш бўйича республика, ҳудудий, туман (шаҳар) штаблари ва ишчи гуруҳлари масъул ходимлари, соҳавий назоратни амалга оширувчи прокуратура ходимлари, Академия тингловчилари, докторантлари ва мустақил изланувчилари, соҳа бўйича илмий изланишларни амалга оширувчи тадқиқотчилар фойдаланишлари мумкин.