“Қийноққа солишга қарши курашиш: халқаро амалиёт ва миллий тажриба” мавзусида идоралараро ўқув курси ўтказилди

2022 йил 26-27 май кунлари Бош прокуратура Академиясида Бош прокуратура, Инсон ҳуқуқлари бўйича Ўзбекистон Республикаси Миллий маркази ҳамда Ички ишлар вазирлиги ҳамкорлигида “Қийноққа солишга қарши курашиш: халқаро амалиёт ва миллий тажриба” мавзусида ўқув курси ўтказилди.

Мазкур ўқув курси Ўзбекистон Республикаси Президентининг “Қийноққа солиш ҳолатларини аниқлаш ва уларнинг олдини олиш тизимини такомиллаштиришга доир қўшимча чора-тадбирлар тўғрисида”ги қарорининг ижроси юзасидан Қорақалпоғистон Республикаси, вилоятлар ва Тошкент шаҳар прокуратураси тизимидаги ходимлари учун ташкил этилди.

Ўқув курсида Инсон ҳуқуқлари бўйича Ўзбекистон Республикаси  Миллий маркази, Ўзбекистон Республикаси Бош прокуратураси Академияси, Ички ишлар вазирлиги Академияси, Тошкент давлат юридик университети, Ички ишлар вазирлиги Малака ошириш институти профессор-ўқитувчилари иштирок этдилар.

Курс давомида қийноқ ҳамда муомала ва жазолашнинг қаттиқ, шафқатсиз, инсонийликка зид ёки қадр-қимматни камситувчи турларига қарши конвенциянинг ҳамда мазкур конвенция Факультатив протоколининг мазмун-моҳияти, қамоққа олишга оид халқаро стандартлар, маҳбуслар ҳуқуқларини таъминлаш кафолатлари ҳамла уларнинг Ўзбекистон Республикаси қонунчилигида ифодаланиши, қийноқларнинг олдини олишга оид миллий превентив механизмлар ва бу борадаги халқаро тажриба каби масалалар муҳокама қилинди.

Тадбир иштирокчилари томонидан мазкур ўқув курси халқаро стандартлар ва халқаро тажриба борасидаги янги маълумотларни олиш ҳамда мавжуд билимларни янада такомиллаштиришга, қийноққа солишга қарши курашишни ташкил этишда халқаро амалиётнинг ижобий жиҳатларини ўрганиш бу соҳадаги билим ва амалий кўникмаларни янада оширишга хизмат қилиши алоҳида таъкидланди.

Тадбир якунида иштирокчиларга сертификатлар топширилди.