Хотин-қизлар ҳуқуқларини таъминлаш соҳасида қонунчилик ижроси устидан назорат бўйича малака ошириш курси бошланди

Ўзбекистон Республикаси Президентининг 2022 йил 1 мартдаги “Оила ва хотин-қизлар билан ишлаш, маҳалла ва нуронийларни қўллаб-қувватлаш тизимини такомиллаштириш чора-тадбирлари тўғрисида”ги ПФ–81-сон Фармони ва “Оила ва хотин-қизлар давлат қўмитаси фаолиятини ташкил этиш тўғрисида”ги ПҚ-146-сон қарорига асосан прокуратура органларига хотин-қизлар ҳуқуқларини таъминлаш ҳамда уларни тазйиқ ва зўравонликдан ҳимоя қилиш соҳаларидаги қонунчилик ҳужжатлари ижроси устидан тизимли назорат ўрнатиш вазифаси юклатилди ҳамда Бош прокуратура ташкилий-штат тузилмасида тегишли бошқарма ташкил этилди.

Шу муносабат билан, Бош прокуратура Академияси, Бош прокуратуранинг Хотин-қизлар ҳуқуқларини таъминлаш ҳамда уларни тазйиқ ва зўравонликдан ҳимоя қилиш соҳаларидаги қонунчилик ҳужжатлари ижроси устидан назорат бошқармаси ҳамкорлигида ва Академиянинг халқаро ҳамкорлари кўмагида махсус малака ошириш курси ишлаб чиқилди ва ташкил этилди.

Курснинг очилиши ва биринчи машғулотида Ўзбекистон Республикаси Бош прокурори ўринбосари С.Артикова иштирок этиб, тингловчиларга курснинг мақсади ва вазифалари, асосий масалалар ва ечимини кутаётган муаммолар борасида тушунтиришлар берди.

Курс доирасида тингловчиларга миллий олимлар, эксперт ва соҳа мутахассислари томонидан гендер тенглигини таъминлаш, “гендер” тушунчаси ва унинг мазмун-моҳияти, аёл психологиясининг ўзига хос хусусиятлари, судларда хотин-қизлар ҳуқуқларини ҳимоя қилишнинг айрим масалалари каби қатор мавзуларда машғулотлар ўтказилади.

Мазкур ўқув курси келгусида хотин-қизлар ҳуқуқларини таъминлаш ҳамда уларни тазйиқ ва зўравонликдан ҳимоя қилиш соҳаларида қонунчилик ижроси устидан прокурор назорати самарадорлигининг ошишига хизмат қилади.