Юридик олий таълим муассасалари битирувчилари билан учрашув ташкил этилди

Aкадемия томонидан мамлакатимизнинг юридик олий таълим муассасалари билан, шу жумладан олий юридик маълумотга эга бўлган энг иқтидорли ва муносиб битирувчиларни Aкадемия магистратурасига ўқишга жалб қилиш борасида доимий ҳамкорлик йўлга қўйилган.

Хусусан, 2022/2023 ўқув йили учун Aкадемия магистратурасига қабул эълон қилиниши арафасида Тошкент давлат юридик университети, Жаҳон иқтисодиёти ва дипломатия университети, шунингдек Тошкент шаҳридаги Халқаро Вестминстер университети битирувчилари билан навбатдаги учрашув бўлиб ўтди. 

Онлайн тарзда ўтказилган учрашувда мазкур олий таълим муассасаларининг 250 нафардан ортиқ битирувчилари, Aкадемия битирувчилар ассоциацияси аъзолари, шунингдек Академия магистратураси тингловчилари иштирок этди.              

Тадбир давомида иштирокчиларга Бош прокуратура Академияси магистратураси тингловчилари учун яратилган имкониятлар, мазкур таълим муассасасида ўқиш ва илмий изланишлар олиб боришнинг афзалликлари ҳақида батафсил маълумотлар берилди.

Иштирокчиларга кириш имтиҳонларини ташкил этиш ва Академия магистратурасида таълим олиш тартиби атрофлича тушунтирилди.

Шунингдек, Академия магистратураси тингловчилари ўзларининг ўқиш давомидаги тажриба ва таассуротлари билан, хусусан ўқув жараёнининг етакчи хорижий мутахассисларни жалб қилган ҳолда халқаро стандартлар асосида кредит-модуль тизими бўйича ташкил этилгани, қонунчилик ва ҳуқуқни қўллаш амалиётидаги долзарб мавзулардаги диссертациялар доирасида илмий изланишлар олиб бориш, шунингдек Aкадемиянинг ҳамкорлари бўлган етакчи хорижий таълим муассасаларида академик мобиллик доирасида магистратура дастурлари бўйича таълим олиш имконияти ҳақида ўртоқлашдилар.