Давлат тест маркази ходимлари учун масофавий малака ошириш курси ўтказилди

Коррупцияга қарши курашиш соҳасида давлат органлари ва бошқа ташкилотлар ходимларининг малакасини ошириш Бош прокуратура Академияси фаолиятининг асосий йўналишларидан бири ҳисобланади.

Мазкур фаолият доирасида Академия томонидан Ўзбекистон Республикаси Вазирлар Маҳкамаси ҳузуридаги Давлат тест марказининг 61 нафар ходимлари учун “Коррупцияга қарши курашиш бўйича самарали идоравий чора-тадбирлар ташкил этилишини таъминлаш” мавзусида қисқа муддатли масофавий малака ошириш курси ўтказилди.

Ўқув курси масофавий шаклда ўтказилди ва марказ ходимларига иш жараёнидан ажралмаган ҳолда коррупция тушунчаси, шакллари ва сабаблари, коррупцияга қарши курашиш соҳасида комплаенс-назорат тизимининг ўрни ва аҳамияти, коррупциявий хавф-хатарлар, манфаатлар тўқнашуви ва уни олдини олиш масалалари, давлат хизматчиларининг одоб-ахлоқ қоидалари ва коррупция учун жавобгарлик каби мавзуларда ўз билим ва малакаларини ошириш имкониятини берди.

Ўқув курсини ижобий тамомлаган тингловчиларга белгиланган намунадаги сертификатлар тақдим этилди.

Ҳозирда Давлат тест марказининг навбатдаги 62 кишидан иборат гуруҳи масофавий шаклда ўқишни бошлади.