Бош прокуратура Академиясида очиқ эшиклар куни

Бош прокуратура Академияси магистратурасига 2022/2023 ўқув йили учун қабул бошланиши муносабати билан, шунингдек фаолият очиқлигини таъминлаш мақсадида жорий йилнинг 10 июнь куни Академияда Очиқ эшиклар куни тадбири ташкил этилди.

Мазкур тадбирга Тошкент шаҳридаги юридик олий таълим муассасалари: Тошкент давлат юридик университети битирувчилари ҳамда бўлажак прокурорлар клуби аъзолари, Жаҳон иқтисодиёти ва Дипломатия университетининг битирувчи талабалари ва Тошкент шаҳридаги Халқаро Вестминстер университетининг битирувчилари ҳамда ОАВ вакиллари таклиф этилди.

Меҳмонларни прокуратура органлари кадрларини тайёрлаш, қайта тайёрлаш ва уларнинг малакасини ошириш тизими билан яқиндан таништириш мақсадида Бош прокуратура Академиясида экскурсия ташкил этилди.

Тадбир давомида иштирокчилар бугунги кунда муҳим аҳамият касб этган масофавий таълим имкониятлари, шу жумладан замонавий ўқув контенти ишлаб чиқиладиган мультимедиа студияси фаолияти билан яқиндан танишишди.

Академиянинг махсус полигонида иштирокчилар тергов-криминалистика тактикалари ва методикаларини амалий қўллаш имитациясида, воқеа жойини кўздан кечириш ва жиноятни очишга оид қизиқарли квест мусобақасида, шунингдек конституциявий ислоҳотлар мавзусидаги викторинада иштирок этишди, ушбу синовда ғолиб бўлган зукко ва билимдон ёшларга китоблар совға қилинди.

Шу билан бирга, экскурсия давомида меҳмонлар суд процесси имитацияси хонаси, криминалистика хонаси, электрон тир ва бошқа амалий ҳамда вазиятли машғулотлар ўтказиш учун махсус жиҳозланган хоналар, шунингдек Академия ўқув аудиторияларида дарс жараёнларини кузатиш имконига эга бўлишди.

Юридик таълим муассасасалари ўқувчиларида Академия магистратурасининг “Прокурорлик фаолияти”, “Тергов фаолияти”, “Коррупцияга қарши курашиш” ҳамда жорий ўқув йилидан бошлаб киритилган “Инсон ҳуқуқларига оид халқаро ҳуқуқ” ўқув дастурлари катта қизиқиш уйғотди. Ёшлар Академия магистратурасига кириш ва таҳсил олиш тартибига оид саволларига атрофлича жавоб олишди.

Ёш авлод вакиллари Академия фаолиятини рақамлаштириш ва ахборот-коммуникация технологияларини кенг жорий этиш жараёнларига оид маълумотга эга бўлдилар.

Тадбирда меҳмонлар шунингдек қизиқарли психологик тест синовида қатнашдилар, шунингдек мобил криминалистик автолаборатория имкониятлари билан танишиб олдилар.

Шунингдек, тадбир иштирокчилари ўртасида китобхонликни тарғиб қилиш мақсадида нашриётлар таклиф этилиб, китоб ярмаркаси ташкил этилди.

Академияда очиқ эшиклар куни ўтказиш яхши анъанага айланиб бўлди, бундай тадбирлар тизимли равишда ўтказиб келинади.