Коррупцияга қарши курашиш агентлигини юқори малакали кадрлар билан тўлдириш мақсадида тест синовлари ўтказилди

Ўзбекистон Республикаси Президентининг 2020 йил 29 июндаги “Ўзбекистон Республикасида коррупцияга қарши курашиш тизимини такомиллаштириш бўйича қўшимча чора-тадбирлар тўғрисида”ги ПФ-6013-сон Фармонига асосан жорий йилнинг 26 август куни Бош прокуратура Академияси базасида Агентликни юқори малакали кадрлар билан тўлдириш жараёнининг тест босқичи ўтказилди.

Танловни сифатли ўтказиш мақсадида Академия томонидан тестларни шаффоф ўтиши ва коррупциоген омилларни истисно этиш имконини берувчи замонавий дастурий жамланмалардан фойдаланилди. Танловни ўтказиш жараёни Агентликнинг Фейсбукдаги расмий саҳифаси орқали онлайн трансляция қилиб борилди.

Шу билан бирга, COVID-19 коронавируси пандемияси сабабли вужудга келган вазиятни инобатга олган ҳолда иштирокчилар томонидан карантин қоидаларига тўла амал қилиниши ҳамда тест ўтказиш хоналарини дезинфекция қилиб борилиши таъминланди.

Ҳудудлардаги тест топшириш жараёни видеоконференцалоқа воситасида кузатиб борилди.