Давлат тест маркази ходимлари учун масофавий малака ошириш курси якунланди

Бош прокуратура Академияси томонидан Ўзбекистон Республикаси Вазирлар Маҳкамаси ҳузуридаги Давлат тест марказининг навбатдаги 62 кишилик гуруҳи учун “Коррупцияга қарши курашиш бўйича самарали идоравий чора-тадбирлар ташкил этилишини таъминлаш” мавзусида қисқа муддатли масофавий малака ошириш курси тамомланди.

Ўқув курс доирасида Давлат тест марказининг ходимлари коррупцияга қарши курашиш, коррупциявий хавф-хатарлар, манфаатлар тўқнашуви ва уни олдини олиш масалалари, давлат хизматчиларининг одоб-ахлоқ қоидалари ва коррупция учун жавобгарлик каби мавзуларда ўз билимларини ошириб олишди.

Масофавий курс якунида тингловчилар билимлари тест синовлари орқали текширилиб, юқори баҳо олганларга эса сертификатлар топширилди.

Маълумот учун, охирги икки ой ичида Академияда Давлат тест марказининг жами 123 нафар ходимлари коррупцияга қарши курашиш соҳасида ўқитилиши таъминланган.