Соғлиқни сақлаш тизими масъул ходимлари учун масофавий малака ошириш курси ўтказилди

Ўзбекистон Республикаси Коррупцияга қарши курашиш миллий кенгашининг 2022 йил 5 апрелдаги баёни тасдиқланган Соғлиқни сақлаш тизимида “Коррупциясиз соҳа” лойиҳасини амалга ошириш юзасидан 2022-2023 йилларга мўлжалланган “Йўл харитаси”да соғлиқни сақлаш ходимлари ўртасида коррупция ҳолатларининг ҳар қандай кўринишларига нисбатан муросасиз муносабатда бўлиш ҳамда коррупцияга қарши курашиш маданияти ва билимини ошириш бўйича амалий тадбирларни йўлга қўйиш вазифаси белгиланган.

Академия томонидан вазирлик бошқармаларининг комплаенс, ички аудит ва молиявий назорат хизмати 32 нафар ходимлари учун “Коррупцияга қарши курашиш бўйича самарали идоравий чора-тадбирлар ташкил этилишини таъминлаш” мавзусида қисқа муддатли масофавий малака ошириш курси ташкил этилди.

Соғлиқни сақлаш тизимида бевосита коррупцияни олдини олиш фаолияти билан шуғулланувчи ходимлар 10 кунлик масофавий курслар давомида коррупцияга қарши курашиш соҳасида комплаенс-назорат тизимининг ўрни ва аҳамияти, коррупциявий хавф-хатарларни аниқлаш ва уни олдини олиш, манфаатлар тўқнашувини тартибга солиш ҳамда коррупция учун ўрнатилган жавобгарлик каби мавзуларда ўз билим ва малакаларини оширишди.

Ўқув курсини муваффақиятли якунлаган тингловчиларга сертификатлар тақдим этилди.

Ҳозирда Соғлиқни сақлаш вазирлиги тизимидаги 165 та тиббиёт муассасалари бош шифокорларидан иборат 4 гуруҳ тингловчилар учун масофавий малака ошириш курси ўтказилмоқда.