Марказий сайлов комиссияси билан ўзаро ҳамкорлик тўғрисидаги келишувни имзолаш маросими бўлиб ўтди

2022 йил 28 июнь куни Ўзбекистон Республикаси Марказий сайлов комиссияси ва Бош прокуратура Академияси, Ўзбекистон Республикаси Президенти ҳузуридаги Давлат бошқаруви академияси, Судьялар олий мактаби, Жамоат хавфсизлиги университети, Ички ишлар вазирлиги академияси, Божхона институти ҳамда Адлия вазирлиги, Олий ва ўрта махсус таълим вазирлиги, Халқ таълими вазирлиги ўртасида ўзаро ҳамкорлик тўғрисидаги келишувни имзолаш маросими бўлиб ўтди.

Мазкур ҳужжатда Ўзбекистон Республикаси Конституциясига ўзгартиришлар киритиш бўйича яқинлашиб келаётган референдумни ўтказувчи комиссиялар фаолиятини илмий-услубий таъминлаш ва самарадорлигини ошириш бўйича ишларни ташкил этиш ҳамда референдум жараёни иштирокчиларининг ҳуқуқий билимини ошириш кўзда тутилган.

Шунингдек, ушбу келишувда референдум ўтказувчи комиссиялар аъзоларининг малакасини оширишни ташкил этиш ва “Бир фуқаро – бир овоз” тенглик тамойилини амалда қўллашга эътибор қаратилган.

Яқинлашиб келаётган референдумни юқори савияда ташкил этиш, умумэътироф этилган халқаро тамойиллар, илғор миллий ва хорижий тажриба асосида ўтказиш мақсадида референдум ўтказувчи комиссиялар аъзоларининг референдум қонунчилиги ва халқаро стандартлар бўйича билим ва амалий кўникмаларини мустаҳкамлаш бўйича семинар-тренингларни тизимли равишда ташкил этиш кўзда тутилган.

Бош прокуратура Академиясининг профессор-ўқитувчиларидан иборат экспертлар гуруҳи томонидан бошқа муассаса ва идоралар билан биргаликда ташкилий-методик ишларни амалга ошириш, махсус ўқув дастурлари ва ўқув-услубий қўлланмаларни ишлаб чиқиш, тренерлар таркибини тайёрлаш, семинар-тренингларини ташкил этиш ва ўтказиш режалаштирилган.

Мазкур Концепциянинг самарали амалга оширилиши референдум ўтказувчи округ ва участка комиссиялари аъзолари ҳамда референдумга тайёргарлик кўриш ва уни ўтказиш жараёнлари бошқа иштирокчиларининг референдумга оид билим ҳамда кўникмаларини юксалтиришга хизмат қилади.