Олий таълим тизими масъул ходимлари учун масофавий малака ошириш курси ўтказилди

Ўзбекистон Республикаси Коррупцияга қарши курашиш миллий кенгашининг 2022 йил 5 апрелдаги баёни билан тасдиқланган Олий таълим соҳасида “Коррупциясиз соҳа” лойиҳасини амалга ошириш юзасидан 2022-2023 йилларга мўлжалланган Йўл харитасида вазирлик, тизимдаги ташкилотлар ходимларини малака ва кўникмаларини орттириш, уларда коррупцияга қарши иммунитетни шакллантириш мақсадида махсус ўқув курсларини ташкил этиш вазифаси қўйилган.

Академия мазкур тадбирнинг ижрочиси сифатида Олий ва ўрта махсус таълим вазирлиги билан ҳамкорликда вазирлик марказий маҳкамаси, ҳудудий бошқармалари, Ўзбекистон журналистика ва оммавий коммуникациялар университети, Фарғона политехника институти, Термиз муҳандислик-технология институти, Навоий давлат кончилик ва технологиялар университети, Андижон давлат университети, Тошкент давлат аграр университети, Тошкент тиббиёт академияси Термиз филиали, Ислом Каримов номидаги Тошкент давлат техника университети Олмалиқ филиали ва бошқа олий таълим муассасаларининг коррупцияга қарши курашишга масъул бўлган ходимлари учун “Коррупцияга қарши курашиш бўйича самарали идоравий чора-тадбирлар ташкил этилишини таъминлаш” мавзусида қисқа муддатли масофавий малака ошириш курси ташкил этилди.

Вазирлик, унинг тизимидаги ташкилотлар ва олий таълим муассасалари ходимлари масофавий ўқув курси давомида коррупциявий хавф-хатарларни аниқлаш ва уни олдини олиш, коррупцияга қарши курашиш соҳасида комплаенс-назорат тизимининг ўрни ва аҳамияти, манфаатлар тўқнашувини тартибга солиш ҳамда коррупция учун ўрнатилган жавобгарлик каби мавзуларда ўз билим ва малакаларини оширишди.

Ўқув курси якунида ижобий баҳоланган тингловчиларга сертификатлар тақдим этилди.

Ҳозирда Академия томонидан вазирлик билан ҳамкорликда навбатдаги ўқишга жалб этиладиган тингловчилар контингенти шакллантирилмоқда.