Сайёр ўқув машғулоти ўтказилди

Академияда ўтказилаётган прокуратура органларида раҳбарлик лавозимларини эгаллаш учун захирада турган кадрларни касбий қайта тайёрлаш курси доирасида тингловчиларининг назарий билим ва амалий кўникмаларини мустаҳкамлаш мақсадида сайёр дарс машғулотлари ўтказиб келинмоқда.

Навбатдаги сайёр ўқув машғулоти “Аграр ва озиқ-овқат соҳаларини ривожлантиришга оид қонунчилик ижроси устидан назоратни ташкил этиш ва амалга ошириш” мавзусида Ўзбекистон Республикаси Қишлоқ хўжалиги вазирлиги ҳамда АТ “Агробанк” билан биргаликда Фермерлар мактабида ташкил этилди.

Сайёр машғулот давомида тингловчилар Фермерлар мактабида ёш фермер хўжаликлари раҳбарлари, шунингдек Ўсимликлар карантини ва ҳимояси соҳасидаги мутахассислар ва бошқа ходимларнинг қишлоқ хўжалиги соҳасида билимларини ошириш борасида амалга оширилаётган ўқув машғулотлари, тингловчиларга яратилган имконият ҳамда шароитлар, олиб борилаётган ўқув машғулотлари модуллари билан бевосита танишдилар.

Шу билан бирга, мактаб жойлашган ҳудуддаги Тошкент давлат Аграр Университетига қарашли тажриба-синов иссиқхоналари, боғлар ва балиқчилик илмий маркази фаолияти билан ҳам яқиндан танишилди.

Машғулот давомида аграр ва озиқ-овқат соҳаларини ривожлантириш йўналишида амалга оширилаётган ишлар, экинларни экиш ва етиштириш борасидаги агротехник тадбирларни амалга ошириш, имтиёзли кредитлар билан таъминлаш, шунингдек ушбу йўналишда қонунчиликка киритилган янгиликлар, амалиётда мавжуд тизимли муаммолар ва камчиликлар, уларни ҳал этиш йўллари ҳамда соҳада қонунчилик ижроси устидан назоратни амалга оширишнинг бошқа долзарб масалалари юзасидан тушунтиришлар берилди.