Сайёр ўқув машғулоти ўтказилди

Академияда ўтказилаётган прокуратура органларида раҳбарлик лавозимларини эгаллаш учун захирада турган кадрларни касбий қайта тайёрлаш курси ўқув машғулотлари давом этмоқда. Курс доирасида тингловчиларнинг назарий билим ва амалий кўникмаларини мустаҳкамлаш мақсадида сайёр дарс машғулотлари ўтказиб келинмоқда.

Хусусан, жорий йилнинг 16 июль куни “Инсон ҳуқуқлари бўйича халқаро стандартларнинг таснифи” мавзусида бўлиб ўтган ўқув машғулоти Инсон ҳуқуқлари бўйича Ўзбекистон Республикаси Миллий марказида ташкил этилди.

Машғулот давомида тингловчилар Инсон ҳуқуқлари бўйича Ўзбекистон Республикаси Миллий марказининг инсон ҳуқуқлари соҳасидаги Ўзбекистон Республикасининг халқаро мажбуриятларини бажариш бўйича давлат органлари ва бошқа ташкилотлар билан ўзаро ҳамкорлиги, миллий маърузалар тайёрлаш бўйича асосий вазифалари, инсон ҳуқуқларини ҳимоя қилиш бўйича халқаро ташкилотлар билан ҳамкорлиги, инсон ҳуқуқларини такомиллаштириш борасида олиб борилаётган илмий тадқиқот ишлари ҳақидаги маълумотлар билан танишдилар.

Шунингдек, Инсон ҳуқуқлари бўйича Ўзбекистон Республикаси Миллий марказининг фуқароларнинг мурожаатлари билан ишлаш соҳасида прокуратура органлари билан олиб борилаётган ҳамкорлиги ва бу ҳамкорлик фуқароларнинг мурожаатларини ҳал этишдаги аҳамияти ҳақида маълумотлар берилди.