Прокуратура органларининг судларда прокурор ваколатини таъминлаш йўналишида хизмат қилаётган тезкор ходимлари учун навбатдаги малака ошириш курси якунланди

Ўзбекистон Республикаси Президентининг 2018 йил 8 майдаги “Прокуратура органлари кадрларини тайёрлаш, қайта тайёрлаш ва уларнинг малакасини ошириш тизимини тубдан такомиллаштириш чора-тадбирлари тўғрисида”ги ПФ–5438-сонли Фармони ҳамда Бош прокурор талабларидан келиб чиққан холда ўқитишнинг амалий хусусияти ва прокуратура органларининг касбий фаолияти билан узвий боғлиқликни таъминлаш ва бу жараёнга масофавий таълимни кенг жорий этишдек Академия фаолиятининг асосий вазифаси ижросини таъминлаш  мақсадида замонавий педагогик ва ахборот-коммуникацион технологиялардан фойдаланган ҳолда ишлаб чиқилган навбатдаги малака ошириш курси республика прокуратура органларининг судларда прокурор ваколатини таъминлаш йўналишида хизмат қилаётган яна бир гуруҳ тингловчилари томонидан якунланди.

Мазкур малака ошириш курси тўлиқ масофавий таълимнинг “4+0” тизими асосида ташкил этилган бўлиб, давомийлиги 144 соатни ташкил этиб, жорий йилнинг 11 май кунидан 2 августига қадар давом этди.

Курс дастури прокуратура фаолиятининг умумий масалалари ҳамда жиноят, фуқаролик ишлари бўйича судларда, иқтисодий ва маъмурий судларда прокурор ваколатини таъминлаш масалалари, ходимларнинг прокурорлик фаолиятининг  ушбу йўналишларидаги назарий билим ва кўникмаларини мустаҳкамлашга қаратилган машғулотлардан иборат бўлиб, унда тингловчилар асосий иш жойидан ажралмаган ҳолда ўзларининг бу борадаги билим ва кўникмаларини  янада ошириш устида ишладилар.

Масофавий малака ошириш курсининг якунида online тарзидаги имтиҳон ўтказилди.

Имтиҳон якунлари бўйича ходимларга белгиланган тартибдаги сертификатлар топширилди.