“Одам савдоси ва технологиялар” мавзусида халқаро муҳокама семинари ўтказилди

Бош прокуратура Академияси томонидан БМТнинг Гиёҳвандлик ва жиноятчилик бўйича бошқармаси ва Қозоғистон Республикаси Бош прокуратураси қошидаги ҳуқуқни муҳофаза қилиш органлари Академияси билан ҳамкорликда Одам савдосига қарши курашиш умумжаҳон кунига бағишлаб “Одам савдоси ва технологиялар” мавзусида аралаш форматда (видеоконференцалоқа орқали) халқаро муҳокама семинари ўтказилди.

Ушбу тадбирда, Ўзбекистон Республикасини давлат идоралари ва нодавлат нотижорат ташкилотлари, халқаро ва хорижий ташкилотларининг мутахассислари ва экспертлари, шунингдек, Қозоғистон, Қирғизистон ва Туркманистон давлатларининг ҳуқуқни муҳофаза қилувчи органлар ва уларни таълим муассасаларининг вакиллари иштирок этишди.

Тадбир иштирокчилари одам савдосига қарши курашиш масаласи Ўзбекистонда давлат сиёсати даражасига кўтарилганини ҳамда давлат органларининг юқори даражадаги вакилларининг иштироки давлатнинг бу мавзуга катта аҳамият бераётганини таъкидлаб  ўтдилар.

Интернетни қўллаган ҳолда жиноятларни содир этилиши, ижтимоий тармоқ фойдаланувчиларининг одам савдоси жабрланувчисига айланиб қолиши, одам савдосига оид жиноий ишларни тергов қилишда электрон далилларни бошқа давлатлардан олиш тартиби ва бошқалар халқаро муҳокама семинарининг асосий мавзуси бўлди.

Тадбир натижаларига кўра, одам савдосига қарши курашиш соҳасида эришилган ютуқлар, мавжуд муаммолар, интернет орқали содир этилаётган одам савдоси жиноятларига давлат органлари ва фуқаролик жамияти институтлари ўртасида ўзаро ҳамкорликни янада кучайтириш ва такомиллаштириш масалалари белгилаб олинди.