Илмий салоҳиятни ошириш йўлида

Ўзбекистон Республикаси Бош прокуратураси Академиясининг илмий салоҳиятини босқичма-босқич ошириб бориш долзарб вазифалардан бири ҳисобланади.

Бош прокуратура Академияси Инсон ҳуқуқлари бўйича Ўзбекистон Республикаси миллий маркази билан идоралараро ҳамкорлиги нафақат ўқув жараёни, балки илмий тадқиқотлар йўналишида ҳам тобора ривожланиб бормоқда.

Хусусан, жорий йилнинг 12 сентябрь куни Бош прокуратураси Академиясининг Илмий маркази бошлиғи, Инсон ҳуқуқлари бўйича Ўзбекистон Республикаси миллий марказининг мустақил изланувчиси Л.Х.Исоқовнинг “Мигрантлар ҳуқуқларини таъминлаш ва ҳимоя қилиш: қиёсий-ҳуқуқий таҳлил” мавзусидаги 12.00.13 – Инсон ҳуқуқлари ихтисослиги бўйича юридик фанлар доктори (DSc) илмий даражасини олиш учун тайёрланган диссертацияси ҳимояси бўлиб ўтди.

Мазкур тадқиқот доирасида мигрантлар ҳуқуқларини таъминлаш ва ҳимоя қилишни такомиллаштиришга қаратилган илмий асосланган таклиф ҳамда тавсиялар ишлаб чиқилган.

Тадқиқот натижасида “Миграция ҳуқуқи” номли дарсликнинг ишлаб чиқилиши орқали миграция ҳуқуқини алоҳида фан соҳаси сифатида тадқиқ қилиш ва уни ўқитилишини ташкиллаштириш миграция жараёнларини ҳуқуқий тартибга солиш соҳасида юқори малакали юридик кадрларни тайёрлаш, қайта тайёрлаш ва малакасини оширишга хизмат қилиши асослантирилган. Шунингдек мигрантлар учун мўлжалланган ва миграция соҳасидаги 50 га яқин интерактив давлат хизматларини ягона платформага бирлаштирган “Musofir-madad” номли инновацион маҳсулот ишлаб чиқилди ва амалиётга татбиқ этилди.

Муҳокамалар натижаларига кўра, мамлакатимизда инсон ҳуқуқлари ихтисослиги бўйича ягона саналадиган Илмий кенгаш аъзолари томонидан ушбу илмий иш бир овоздан ижобий баҳоланиб, Л.Исоқовнинг диссертацияси тугалланган деб топилди ва юридик фанлар доктори (DSc) илмий даражасини бериш юзасидан Вазирлар Маҳкамаси ҳузуридаги Олий аттестация комиссиясига ҳужжатларни тақдим этиш юзасидан қарор қабул қилинди.

Академия жамоаси Л.Исоқовни диссертациянинг муваффақиятли ҳимояси билан табриклайди ва келгусидаги илмий ҳамда касбий фаолиятида улкан зафарлар тилайди.