Фуқаролик процессуал ҳуқуқи фанидан дарслик тайёрланди

Бош прокуратура Академияси ҳамда Тошкент давлат юридик университети билан ҳамкорликда муаллифлар жамоаси томонидан фуқаролик процессуал ҳуқуқи фанининг етакчи олимларидан бири, ю.ф.д., профессор М.М.Мамасиддиқовнинг умумий таҳрири остида “Фуқаролик процессуал ҳуқуқи” дарслиги тайёрланиб, “Адолат” миллий ҳуқуқий ахборот маркази томонидан нашр эттирилди.

Мазкур дарслик Ўзбекистон Республикаси Олий ва ўрта махсус таълим вазирлигининг 2022 йил 13 майдаги 166-сонли буйруғига асосан чоп этиш учун тавсия этилган. 2022 йил 10 август куни нашрга рухсат этилган.

Дарслик Давлат таълим стандарти асосида тузилган “Фуқаролик процессуал ҳуқуқи фани дастури”га мувофиқ ҳамда шахсга йўналтирилган, ривожлантирувчи ва мустақил таълим олиш технологиялари, тамойиллари ва талаблари асосида тайёрланган. Унда фуқаролик процессуал ҳуқуқининг умумий ва махсус қисмига оид барча масалалар батафсил кўриб чиқилган.

Ушбу дарслик нафақат малака ошириш муассасаси, олий ўқув юрти тингловчилари ва талабалари учун, балки прокуратура ходимлари, фуқаролик, иқтисодий ва маъмурий ишлар бўйича судларнинг судьялари, адвокатлар, шунингдек, кенг китобхонлар оммаси учун ҳам мўлжалланган.