Жиноятлар содир этилиши сабабларини аниқлаш ва жиноятчилик статистикасини такомиллаштириш масалаларидаги халқаро ҳамкорлик

2022 йил 15 сентябрь куни Япония Адлия вазирлиги Тадқиқот ва малака ошириш институти делегациясининг Ўзбекистон Республикаси Бош прокуратураси Академиясига ташрифи бўлиб ўтди.

Жиноятлар содир этилишининг сабаб ва шароитларини ўрганиш ҳамда диагностика қилиш, жиноятчи ва жабрланувчиларнинг шахси бўйича илмий-амалий изланишлар олиб бориш каби Академиянинг таҳлилий фаолияти борасидаги масалаларда ўзаро тажриба алмашиниш, бу борада ўзаро ҳамкорлик муносабатларини янада кенгайтириш мақсадида икки томонлама учрашув ташкил этилди.

Ҳамкорлар Академиянинг Жиноятларнинг содир этилиши сабабларини тизимли таҳлил қилиш ва ўрганиш маркази фаолияти билан, шунингдек, инновацион таълим технологиялари ва ахборот-коммуникация имкониятларини жорий этган ҳолда илм-фан, таълим ва амалиёт яхлитлигига асосланган замонавий илмий-таълим муҳитини яратиш борасидаги Академия тажрибаси билан танишдилар.

Томонлар жиноятлар содир этилиши сабабларини таҳлил қилиш, жамоат хавфсизлигини таъминлаш, жиноятчилик ва ҳуқуқбузарликлар профилактикаси соҳасида қўшма илмий-тадқиқот ва  таҳлилий фаолиятни кенгайтириш, бунда қўлланиладиган инстурментлар ва методикалар борасида тажриба алмашинишни янада ривожлантириш борасида келишиб олдилар.

Ташриф доирасида шунингдек ҳуқуқни муҳофаза қилувчи органлар ва уларнинг таълим муассасалари вакиллари иштирокида бир қатор халқаро ва идоралараро тадбирлар режалаштирилган.