Суд қарорларини қайта кўриш институти ва уларни ижро этиш масалалари мавзусига бағишланган малака ошириш курси

Бош прокуратура Академиясида Бош прокурор томонидан ўқув жараёнини прокуратура органларининг касбий фаолияти билан узвий боғлиқлигини таъминлашга оид белгиланган вазифалар ижроси доирасида туман (шаҳар) прокурорлари ва уларга тенглаштирилган прокурорларнинг ўринбосарлари ва ёрдамчилари иштирокида “Суд қарорларини қайта кўриш институти ва уларни ижро этиш масалалари”  мавзусида малака ошириш курси бошланди.

Курс дастури доирасида прокуратура фаолиятининг ташкилий-ҳуқуқий асослари, шунингдек маъмурий судларда ва жиноят, фуқаролик, иқтисодий  ишларни судларда кўрилишида прокурор ваколатини таъминлаш ҳамда суд қарорларини ижро этишда қонунчиликка риоя этилиши устидан прокурор назоратини амалга ошириш масалалари қамраб олинган бўлиб, тингловчиларнинг мазкур йўналишлардаги назарий билим ва кўникмаларини мустаҳкамлашга қаратилган машғулотлардан таркиб топган.

Ўқув машғулотлари давомида мамлакатимизда амалга оширилаётган суд-ҳуқуқ ислоҳотлари шароитида амалдаги қонунчиликка киритилаётган янгиликлар, суд қарорларини қайта кўриш институти такомиллаштирилишининг зарурати, амалиётда мавжуд бўлган муаммолар ва уларнинг ечими билан боғлиқ масалалар ёритилади.

Тасдиқланган дастур асосида ўтказилаётган ўқитишнинг масофавий шаклида ҳар ўқув ҳафтасининг якуни бўйича ташкиллаштирилиши назарда тутилган синхрон ўқув машғулотлари давомида ҳафталик ўзлаштиришни мониторинг қилиб бориш билан бирга, амалдаги қонунчилик талаблари ҳамда мавзу доирасидаги саволларга тушунтириш бериш режалаштирилган.

Малака ошириш курсининг якуний босқичида эса тингловчиларнинг масофадан ўзлаштирган билим ва кўникмалари бевосита аудитория машғулотлари жараёнида тренинг ҳамда ўқитишнинг интерфаол услубларидан фойдаланган ҳолда, муаммоли-вазиятли ҳолатларни таҳлил қилиш ва казуслар ечимини топиш воситасида мустаҳкамланиб, тингловчиларнинг курс дастурини ўзлаштириш даражаси баҳоланади.

Малака ошириш курси ўқув дастурининг ўтказилиш тартиби ҳамда амалий топшириқларни бажариш қоидалари юзасидан тингловчиларга видеоконференцалоқа воситасида тушунтиришлар берилди. Тингловчиларнинг Академия билан узлуксиз алоқада бўлиш имкониятларини таъминлаш чоралари кўрилди.