Жиноий суд ишларини юритишда прокурор иштирокининг масалалари муҳокама қилинди

2022 йилнинг 21 сентябрь куни Бош прокуратура Академиясида халқаро экспертлар иштирокида “Жиноий суд ишларини юритишда прокурор иштирокининг долзарб масалалари” мавзусидаги давра суҳбати бўлиб ўтди.

Тадбирда Туркия Адлия вазирлиги, суд органлари, Адлия Академияси ҳамда Ўзбекистон Республикаси Бош прокуратураси, Судьялар олий кенгаши, Судьялар олий мактаби ва Бош прокуратура Академияси вакиллари иштирок этдилар.

Тадбир Ўзбекистон Республикаси Бош прокуратураси Академияси ва Туркия Адлия Академияси ўртасидаги прокуратура ходимларининг касбий салоҳиятини мустаҳкамлаш бўйича икки томонлама ҳамкорликни кенгайтиришга қаратилган Англашув меморандуми низомини амалга ошириш доирасида ташкил этилди.

Тадбир давомида иштирокчилар судьялар мустақиллиги ва дахлсизлигини таъминлаш кафолатлари соҳасида, жиноят ишларида ярашув институтини қўллаш доирасида, шахс ҳуқуқларининг суд орқали ҳимоя қилишда, қонунчиликни такомиллаштиришда ҳамда юқорида келтирилган фаолиятлар бўйича прокурорларни касбий тайёрлашда Туркия ва Ўзбекистон тажрибасини кўриб чиқдилар.

Тадбир конструктив руҳда ўтказилди, муҳокама жараёнида иштирокчилар ўзларини қизиқтирган саволларга жавоб олишди.

Иштирокчилар бундай форматдаги тадбирлар суд-ҳуқуқ соҳасининг долзарб масалалари бўйича жонли фикр алмашиш ва муваффақиятли халқаро амалиётни жорий этишга хизмат қилаётганини алоҳида таъкидладилар.