“Тил – миллат кўзгуси” мавзусидаги  танловнинг шеърхонлик йўналиши якуний босқичи ўтказилмоқда

Бош прокуратура Академиясида 12-14 октябрь кунлари прокуратура органлари ходимлари иштирокида 21 октябрь – Ўзбек тили байрами кунига бағишланган “Тил – миллат кўзгуси” мавзусидаги танловнинг якуний босқичи ўтказилмоқда.

Танлов прокуратура органлари фаолиятида давлат тили имкониятларидан тўлиқ ва тўғри фойдаланишга эришиш, давлат тилининг нуфузини янада юксалтириш, шунингдек, ходимларнинг нутқ маданиятини ошириш ҳамда давлат тилида иш юритишга оид амалий кўникмаларни ривожлантириш мақсадида “Таҳлилий иш танлови”, “Саводхонлик танлови” ва “Шеърхонлик танлови” йўналишлари бўйича ўтказилмоқда.

Танлов барча йўналишлар бўйича икки босқичда амалга оширилмоқда. Биринчи босқич Бош прокуратура маҳкамасида, Қорақалпоғистон Республикаси, вилоятлар, Тошкент шаҳар прокуратуралари ва уларга тенглаштирилган прокуратураларда, Бош прокуратура ҳузуридаги Иқтисодий жиноятларга қарши курашиш департаментида ва Мажбурий ижро бюросида ташкил этилиб, унда жами 350 нафардан зиёд номзодлар иштирок этди.

Таҳлилий иш танловида номзодлар олдиндан эълон қилинган казуслардан бирини танлаб таҳлилий ечимлар кўрсатилган ишни тайёрлаб танлов комиссиясига тақдим этишди. Саводхонлик танлови бўйича номзодлар ўзбек адабий тили меъёрлари ва лотин ёзувига асосланган ўзбек тили доирасида тест синови топширдилар. Шеърхонлик танловида эса, номзодлар ўзлари танлаган шеърий матнни танлов ҳайъати аъзолари ҳузурида ўқиб эшиттирдилар.

Учта йўналиш бўйича танловда муваффақиятли иштирок этган 149 нафар номзодлар танловни ўтказиш бўйича Ҳайъат ва танлов комиссиялари тавсиясига кўра якуний босқичда иштирок этиш имкониятига эга бўлди.

Танлов натижаларига кўра барча йўналишлар ва номинациялар бўйича ғолиблар диплом ва совғалар билан тақдирланадилар.