Бош прокуратура Академиясида Dark Web лабораторияси очилди

2022 йил 17 октябрь куни Академияда ЕХҲТнинг Ўзбекистондаги лойиҳалари координатори офиси кўмагида ташкил этилган Dark Web лабораториясининг очилиш маросими бўлиб ўтди.

Тадбирда Ўзбекистон Республикаси Бош прокурорининг ўринбосари Э.Т.Юлдашев, ЕХҲТнинг Ўзбекистондаги лойиҳалари координатори в.б. Ханс-Ульрих Им, ЕХҲТ Котибияти вакили Юрай Носал, Бош прокуратура Академияси бошлиғи Е.В. Коленко, шунингдек, республика ҳуқуқни муҳофаза қилиш органлари ходимлари иштирок этди.

Академия ва ЕХҲТ Ўзбекистондаги лойиҳалари координаторининг ҳамкорликдаги саъй-ҳаракатлари натижасида чуқур ва яширин Интернет тармоқларида ишлашда ҳуқуқни муҳофаза қилиш органлари ходимларининг амалий кўникмаларини шакллантиришга, шунингдек, тегишли рақамли далилларни қидириш ва қайд этишга ёрдам берувчи республикада илк Dark Web ўқув лабораторияси ташкил этилди.

Лаборатория замонавий компьютер ва тармоқ ускуналари, жумладан, Интернет тармоғининг яширин сегментида ишлаш учун зарур дастурий таъминот билан таъминланган.

Бу Академиянинг жиноятчиликка, жумладан, кибержиноятчиликка қарши курашишнинг замонавий технологияларини ўрганиш, кибермакондаги замонавий чақириқ ва таҳдидларга фаол жавоб бериш билан боғлиқ услубий ва таҳлилий фаолияти бўйича салоҳиятини сезиларли даражада кучайтирди.

Янги очилган Dark Web лабораторияси негизида криптовалюталар ва Darknet тармоғидан фойдаланган ҳолда содир этилган жиноятларни тергов қилиш бўйича тренинглар туркуми бошланди.