Тил ва ҳуқуқ: муаммолар ва истиқболлар

Ўзбек тилига давлат тили мақомининг берилиши ҳалқимизнинг миллий мустақилликка эришиш йўлидаги муҳим силжишлардан бири бўлиб, она тилимизнинг бор гўзаллиги ва жозибасини тўла намоён этиш билан бирга, уни илмий асосда ривожлантириш борасида ҳам кенг имкониятлар яратди.

2020 йил 10 апрелда Ўзбекистон Республикасининг “Ўзбек тили байрам кунини белгилаш тўғрисида”ги Қонуни қабул қилиниши “Ўзбек тили байрами куни” этиб нишонлашга ҳуқуқий асос бўлди.

Ўзбек тили байрами кунини нишонлаш доирасида Ўзбекистон Республикаси Бош прокуратураси Академиясида 2022 йил 19 октябрь куни “Тил ва ҳуқуқ: муаммолар ва истиқболлар” мавзусида конфереция бўлиб ўтди.

Ушбу конференцияда Ўзбекистон Республикаси Олий Мажлис Сенати ва Қонунчилик палатаси, Вазирлар Маҳкамаси, Ўзбекистон Республикаси Жамоат хавфсизлиги университети, Самарқанд давлат университети, бошқа давлат идоралари ва ташкилотлар вакиллари, шунингдек, Бош прокуратура ходимлари иштирок этишди.

Конференция жараёнида “Давлат тили соҳасидаги қонунчилик ҳужжатлари таҳлили”, “Давлат тили мақоми: тарихий-ҳуқуқий таҳлил”, “Давлат тилига оид қонунлар ижросининг ҳолати” ва бошқа мавзуларда маърузалар эшитилди.

Тадбир якунида мавзу юзасидан қизғин мунозаралар бўлиб ўтди.