Иқтисодий жиноятларга қарши курашиш департаментининг ҳудудий бошқарма бошлиқлари ўринбосарлари учун масофавий малака ошириш курслари

Бош прокуратура Академиясида Иқтисодий жиноятларга қарши курашиш департаментининг ҳудудий бошқарма бошлиқлари ўринбосарлари учун малака ошириш курслари бошланди.

Мазкур курслар Академиянинг «ProAcademy» электрон ахборот-таълим портали базасида масофавий таълим шаклида амалга оширилмоқда.

Ўқув курслари дастури жиноий схемалар ва коррупцион қилмишларни аниқлашда тизимли таҳлил, суриштирув ва тезкор-қидирув фаолиятини амалга ошириш, жиноий фаолиятдан олинган даромадларни легаллаштириш, бюджет маблағларини талон-торож қилиш, солиқ ва валюта соҳасидаги жиноятларга қарши курашишни ташкил этиш масалаларини қамраб олган.

Курс давомида раҳбар кадрларнинг бошқарувни ташкил этишга оид кўникмаларини ривожлантиришга қаратилган раҳбарнинг лидерлик салоҳияти, вақтни унумли бошқариш, жамоада ижобий муҳитни ва психологик барқарорликни таъминлаш бўйича машғулотлар назарда тутилган.

Курсни ўтказишни лозим даражада ташкил этиш мақсадида тингловчиларга ишдан ажралмаган ҳолда курсни ўташ тартиби, амалий топшириқларни бажариш қоидалари таништирилиб, уларнинг Академия профессор-ўқитувчилари билан доимий алоқада бўлиш имкониятларини таъминлаш чоралари кўрилди.