Ўзбекистонда Комплекс миллий молиялаштириш стратегияси муҳокамаси бўйича йигилишда иштирок этилди

Академия бошлиғи ўринбосари У.Нигмаджанов Ўзбекистонда Комплекс миллий молиялаштириш стратегияси лойиҳаси муҳокамасига бағишланган йиғилишнинг “Мусодара қилинган активларни бошқариш тизими ва ноқонуний молиявий оқимларни камайтириш” мавзусидаги сессиясида маъруза билан иштирок этди.

Тадбир Молия ва Иқтисодий тараққиёт ва камбағалликни қисқартириш вазирликлари томонидан БМТТД билан ҳамкорликда мамлакат барқарор ривожланишининг молиялаштириш стратегияси бўйича масалаларни чуқур муҳокама қилиш мақсадида ташкил этилди.

Сессияда ҳалолликни таъминлаш, коррупция ва жиноий даромадларни легаллаштиришга қарши курашиш, хатланган ва мусодара қилинган активларни бошқариш, ноқонуний молиявий оқимлар ҳажмини камайтириш масалалари муҳокама қилинди.

Маърузачилар томонидан Бош прокуратура Академияси ишчи орган деб белгиланган 2030 йилгача бўлган даврда Барқарор ривожланишнинг (БРМ)  кун тартиби бўлган 16-мақсадига эришиш бўйича Самарали бошқарув ишчи гуруҳи фаолиятини мувофиқлаштириш чора-тадбирлари тўғрисида маълумот берилди.

Бош прокуратура ва унинг тузилмалари томонидан БМТ ГЖБ билан биргаликда хатланган активларни бошқариш тизимини баҳолаш ва унинг самарадорлигини ошириш, шунингдек, БРМ 16.4-мақсадини амалга оширишда ноқонуний молиявий оқимлар ҳажмини ўлчаш соҳасида амалга оширилаётган лойиҳалар қайд этилди.

Мазкур лойиҳаларнинг дастлабки натижалари ва уларни амалга оширишнинг кейинги босқичлари муҳокама қилинди, шунингдек, Ўзбекистонда Комплекс миллий молиялаштириш стратегияси лойиҳаси, хусусан, коррупцияга барҳам бериш ва ноқонуний молиявий оқимлар ҳажмини камайтиришни такомиллаштириш бўйича таклифлар билдирилди.