Олий таълимдан кейинги таълим институтини янада такомиллаштиришнинг долзарб муаммолари

2020 йил 15 ноябрь куни Ўзбекистон Республикаси Президентининг 2019 йил 30 августдаги “Ёшларни илм-фан соҳасига жалб этиш ва уларнинг ташаббусларини қўллаб-қувватлаш тизимини такомиллаштириш чора-тадбирлари тўғрисида”ги ПҚ–4433-сон қарорида белгиланган вазифалар ижросини таъминлаш мақсадида Бош прокуратура Академиясида “Олий таълимдан кейинги таълим институтини янада такомиллаштиришнинг долзарб муаммолари” мавзусида илмий-амалий конференция ўтказилди.

Тадбирда Ўзбекистон Республикаси Бош прокуратураси, Инновацион ривожланиш вазирлиги, Вазирлар Маҳкамаси ҳузуридаги Олий аттестация комиссияси масъул ходимлари, шунингдек Инсон ҳуқуқлари бўйича Ўзбекистон Республикаси Миллий маркази, Жамоат хавфсизлиги университети, Тошкент давлат юридик университети, Бош прокуратура ва ИИВ Академиялари профессор-ўқитувчилари, докторантлари ва мустақил изланувчилари иштирок этишди.

Олий таълимдан кейинги таълим институтини ривожлантиришда таълим ва илмий-тадқиқот муассасаларининг ўрни, уларнинг фаолиятини янада такомиллаштириш, соҳага доир бугунги кундаги муаммолар ва уларга ечимлар  атрофлича муҳокама қилинди.

Конференция якуни бўйича Ўзбекистон Республикаси Президентининг “Олий малакали илмий ва илмий-педагог кадрларни аттестациядан ўтказиш тизимини янада такомиллаштириш чора-тадбирлари тўғрисида”ги қарори лойиҳасига тегишли таклиф ва тавсиялар ишлаб чиқилди.