Сайёр амалий машғулотлар ўтказилмоқда

Академияда аудитория машғулотлари жараёнида олинган назарий билимларни амалиётга татбиқ этиш ва мустаҳкамлаш мақсадида малака ошириш курслари дастурларида сайёр амалий машғулотлар ўтказилиши назарда тутилган.

Навбатдаги амалий машғулот Тошкент шаҳар ИИББ Ҳуқуқбузарликлар профилактикаси бошқармасининг Вояга етмаганларга ижтимоий-ҳуқуқий ёрдам кўрсатиш марказида ижтимоий ва иқтисодий соҳадаги қонун ҳужжатлари ижроси устидан прокурор назоратини таъминлашнинг долзарб масалалари бўйича малака ошириш курси тингловчилари учун “Бола ҳуқуқлари кафолатлари” мавзусида ташкил этилди.

Сайёр ўқув машғулоти давомида тингловчилар марказга олиб келинган назоратсиз ва қаровсиз қолган вояга етмаганлар учун яратилган шароитлар, шунингдек, вояга етмаганларни ижтимоий муҳофаза қилиш соҳасидаги қонун ҳужжатлари ижроси юзасидан олиб борилаётган ишлар билан бевосита танишдилар.

Тингловчилар томонидан амалиётчи мутахассислар билан биргаликда вояга етмаганлар тўғрисидаги қонун ҳужжатлари ижроси устидан прокурор назоратини амалга оширишда мавжуд тизимли муаммо ва камчиликлар, уларни бартараф этиш чора-тадбирлари ҳамда бошқа долзарб масалалар муҳокама қилинди.