Жиноий даромадларни легаллаштиришга қарши кураш масалалари бўйича навбатдаги симуляцион тренинг ташкил этилди

Академия томонидан Бош прокуратура ҳузуридаги Иқтисодий жиноятларга қарши курашиш департаменти, ИИВ, БМТнинг Гиёҳвандлик ва жиноятчилик бўйича бошқармасининг Марказий Осиёдаги минтақавий ваколатхонаси билан ҳамкорликда АҚШнинг Ўзбекистондаги элчихонаси кўмагида 2022 йилнинг 16-18 ноябрь кунлари Бош прокуратура Академиясида “Гиёҳванд моддаларнинг ноқонуний муомаласидан келиб тушган даромадларни легаллаштиришга қарши курашиш” мавзусида навбатдаги халқаро симуляцион тренинг ўтказилди.

Тренинг Ўзбекистон Республикасининг жиноий фаолиятдан олинган даромадларни легаллаштиришга, терроризмни молиялаштиришга ва оммавий қирғин қуролини тарқатишни молиялаштиришга қарши курашиш миллий тизимини ривожлантириш стратегиясида (Ўзбекистон Республикаси Президентининг 2021 йил 28 июндаги ПФ–6252-сон Фармони) белгиланган вазифаларни амалга ошириш бўйича йўл харитасининг 27-банди ижросини таъминлаш мақсадида ташкил этилди.

Тадбирда Андижон, Наманган ва Фарғона вилоятлари прокуратура, Иқтисодий жиноятларга қарши курашиш департаменти ва ички ишлар органлари терговчи ва тезкор ходимлари, Ўзбекистон Республикаси Вазирлар Маҳкамаси ҳузуридаги Наркотик моддаларни назорат қилиш миллий ахборот-таҳлил маркази ҳамда Тожикистон Республикаси Бош прокуратураси вакиллари иштирок этди.

Тренинг давомида иштирокчилар гиёҳванд моддалар ёки психотроп воситалар билан қонунга хилоф равишда муомала қилиш билан боғлиқ жиноий ишлар доирасида параллел молиявий тергов ўтказиш борасидаги халқаро амалиёт, амалга оширилиши зарур бўлган идоралараро ҳамкорлик ва бундай жиноятларни тергов қилиш давомида халқаро ташкилотларнинг тутган ўрни тўғрисида маълумот олдилар.

Тадбир амалий характерга эга бўлиб, имитацион тренингда тортишувчанликни таъминлаш мақсадида иштирокчилар турли ташкилот вакилларидан иборат гуруҳларга бўлинди.

Гуруҳлар олдиндан тайёрланган жиноят иши макети ва видеоматериаллар асосида процессуал ва тергов ҳаракатларини (тинтув, далилларни тўплаш ва кўздан кечириш, сўроқ қилиш ва бошқа) амалга оширдилар, процессуал қарорлар чиқардилар, тергов натижаларига кўра айблов хулосаси ҳамда схемалар тайёрланиб, ҳакамларга тақдим этилди ва улар томонидан баҳоланди.

Тренинг жараёнида олинган кўникмалар жиноий фаолиятдан олинган даромадларни легаллаштиришга қарши курашиш миллий тизими самарадорлигини ошириш, ўзаро баҳолаш доирасида халқаро экспертлар томонидан берилган тавсияларни бажариш ва идоралараро ҳамкорликни кучайтиришга хизмат қилади.

Курс якуни бўйича иштирокчиларга сертификатлар берилди.