“Инсон ҳуқуқлари соҳасида таълим” Глобал форумида иштирок этилди

Академия вакиллари Ўзбекистон Республикаси Президенти ташаббуси билан Самарқанд шаҳрида ташкил қилинган “Инсон ҳуқуқлари соҳасида таълим” Глобал форумида иштирок этишди.

Самарқанд Глобал форуми БМТ Инсон ҳуқуқлари бўйича Олий комиссари бошқармаси ва унинг минтақавий бюроси, БМТнинг Ўзбекистондаги ваколатхонаси, ЮНИСЕФ, БМТ ҚОКБ, БМТ ГЖБ, ЕХҲТнинг Демократик институтлар ва инсон ҳуқуқлари бўйича бюроси, ЕХҲТнинг Ўзбекистондаги Лойиҳалари мувофиқлаштирувчиси офиси, Европа Кенгаши, Ф.Эберт номидаги фонд каби халқаро ҳамкорлар билан биргаликда ташкил этилди.

Глобал форумда дунёнинг турли давлатларидан инсон ҳуқуқлари соҳасидаги таълим мутахассислари, давлат органлари, халқаро ва минтақавий ташкилотлар, ихтисослаштирилган таълим муассасалари, нодавлат нотижорат ташкилотлари ҳамда фуқаролик жамиятининг бошқа институтлари вакилларидан иборат 120 дан ортиқ халқаро экспертлар иштирок этишди.

Академия раҳбарияти “Касбий институтлар (судлар, ҳуқуқни муҳофаза қилиш органлари, адвокатура) орқали инсон ҳуқуқлари соҳасида узлуксиз таълимни таъминлаш: тамойиллар, ёндашувлар ва замонавий муаммолар” мавзусида ташкил этилган учинчи сессия доирасида “Прокурорлар учун инсон ҳуқуқлари соҳасидаги таълим” мавзусида маъруза қилди.

Иштирокчиларга Академияда инсон ҳуқуқларини таъминлаш масалалари бўйича илғор халқаро тажриба ва замон талабларига асосланган ўқув жараёнини ташкил этиш юзасидан маълумот берилди.

Глобал форум якунида Инсон ҳуқуқлари соҳасидаги таълим бўйича якуний ҳужжатнинг қабул қилиниши кўзда тутилган.