Ўзбекистон Республикаси Бош прокуратурасининг Академиясида ПФ-6034-сон Фармонининг мазмун-моҳияти мавзусида ўқув-амалий семинари ўтказилди

Ўзбекистон Республикаси Бош прокуратураси Академиясида жорий йилнинг 17 август куни Бош прокуратуранинг марказий маҳкамаси ходимлари билан ҳамкорликда “Ўзбекистон Республикаси Президентининг 2020 йил 24 июлдаги “Судлар фаолиятини янада такомиллаштириш ва одил судлов самарадорлигини оширишга доир қўшимча чора-тадбирлар тўғрисида”ги  ПФ-6034-сон Фармонининг мазмун-моҳияти ва ундан келиб чиқадиган талаблар” мавзусида ўқув семинари ташкиллаштирилди.

Семинарда Қорақалпоғистон Республикаси, вилоятлар, Тошкент шаҳар ва уларга тенглаштирилган прокуратураларнинг ҳамда туман (шаҳар) прокуратураларининг судларда прокурор ваколатини таъминлаш йўналишида фаолият юритаётган ходимлари иштирок этдилар.

Тадбирда Фармон билан қонунчиликка кириб келиши кутилаётган янгиликлар атрофлича муҳокама этилди.

Семинарда Давлатимиз раҳбари ҳузурида 30 июнь куни бўлиб ўтган кенгайтирилган видеоселектор йиғилишининг талабларидан келиб чиққан холда суд муҳокамаси якунларига кўра судланувчининг айбсизлиги рўйи-рост маълум бўлиб қолган тақдирда прокурор томонидан айбловдан воз кечилиши нормалари юзасидан алоҳида тушунтиришлар берилди.

Шунингдек тадбир давомида фуқаролик, иқтисодий ва маъмурий суд йўналишларида кутилаётган ўзгартиришлар бўйича ҳам тушунтиришлар берилиб, фикр ва мулоҳазалар билдирилди.

Ўз навбатида, Бош прокуратура марказий маҳкамасининг ходимлари томонидан судларда прокурор ваколатини таъминлаш йўналишида келгусида ишларни ташкиллаштириш борасида ҳам тушунтиришлар бериб ўтилди.

Вилоят студияларидан ҳамда аудиоселектор орқали тадбирда иштирок этган қуйи турувчи прокуратуралар ходимлари маърузалар якуни бўйича ўтказилган мунозараларда фаол иштирок этдилар.

Тадбир якуни бўйича мазкур Фармоннинг мазмун-моҳияти, ундан келиб чиқадиган вазифалар ҳамда ижроси билан боғлиқ масалалар юзасидан мунтазам равишда ўқув семинарларини ташкиллаштириб бориш чоралари кўрилиши ҳақида фикр билдирилди.