Давлат органлари ходимларининг коррупцияга қарши курашиш соҳасидаги малакасини ошириш ишлари давом этмоқда

Коррупцияга қарши курашиш соҳасида махсус ўқув дастурлари асосида давлат органлари ва бошқа ташкилотлар ходимларининг малакасини ошириш ва қайта тайёрлаш тизимини йўлга қўйиш Академия фаолиятининг асосий вазифалари ва йўналишларидан бири ҳисобланади.

Шу мақсадда Академия томонидан мунтазам равишда давлат органларининг коррупцияга қарши курашиш тузилмалари ходимлари учун масофавий шаклда махсус ўқув курслари ташкил этилмоқда.

Масалан, 2022 йилда давлат органлари ва бошқа ташкилотларнинг 700 нафарга яқин ходимлари иштирокида 20 дан ортиқ коррупцияга қарши курашиш бўйича малака ошириш курслари ўтказилиб, уларнинг 600 нафардан ортиғи масофавий шаклдаги ўқув курслари доирасида таҳсил олдилар, курсларни муваффақиятли тамомлаган 454 нафар (ёки 75,5%) тингловчиларга сертификатлар тақдим этилди.

Ҳозирда Академияда Тошкент шаҳар ва вилоят ҳокимликлари, Ветеринария ва чорвачиликни ривожлантириш қўмитаси, Давлат активларини бошқариш агентлиги, Давлат тест маркази, Рақамли технологиялар, Мактабгача ва мактаб таълими, Маданият ва туризм вазирликлари, “O’zagrosug’urta” ва “Ўзтрансгаз” акциядорлик жамиятларининг жами 300 нафардан ортиқ ходимлари учун “Коррупцияга қарши курашиш бўйича самарали идоравий чора-тадбирлар ташкил этилишини таъминлаш” ҳамда “Коррупцияга қарши курашишнинг умумий асослари” мавзуларида қисқа муддатли масофавий малака ошириш курслари давом эттирилмоқда.