Ихтиёрий миллий ҳисоботни тайёрлаш учун тажриба алмашиш доирасида Мўғилистон ва Тожикистон делегациясининг ташрифи

2030 йилгача Миллий барқарор ривожланиш мақсадларига (БРМ) эришиш борасидаги ихтиёрий миллий ҳисоботни тайёрлаш доирасида ЭСКАТОнинг тажриба алмашиш (Twinning) дастури координатори Кейтлин Луиз Портер бошчилигидаги Мўғилистон ва Тожикистон экспертларининг Академияга ташрифи амалга оширилди.

Делегация таркиби БМТнинг ҳудудий координаторлари, Мўғилистон ва Тожикистон давлатларининг тегишли вазирлик ва идоралари, инсон ҳуқуқлари бўйича ташкилотлари ва фуқаролик жамияти вакилларидан ташкил топди.

Учрашув давомида Академия бошлиғи ўринбосари, “Самарали бошқарув” йўналиши бўйича экспертлар гуруҳининг масъул котиби томонидан МБРМнинг 16-мақсади юзасидан ихтиёрий миллий ҳисоботни тайёрлаш доирасида амалга оширилган ишлар, шунингдек Вазирлар Маҳкамасининг 2022 йил 21 февралдаги “2030 йилгача бўлган даврда барқарор ривожланиш соҳасидаги миллий мақсад ва вазифаларни амалга оширишни жадаллаштириш бўйича қўшимча чора-тадбирлар тўғрисида”ги 83-сон қарорига асосан мазкур гуруҳнинг фаолиятини мувофиқлаштириш борасидаги ишлар тўғрисида маълумот тақдим этилди.

Тадбир иштирокчилари ҳуқуқбузарликларнинг виктимологик профилактикаси юзасидан ўтказилган тадқиқотлар, гендер тенгликни, инсон ҳуқуқларини таъминлаш, аёллар ва болаларга нисбатан зўравонликнинг олдини олиш, коррупция ва ноқонуний молиявий оқимларга қарши курашиш борасидаги ислоҳотлар, шунингдек статистик маълумотларни тўплаш амалиёти ва БРМ кўрсаткичлари методологияси ва индикаторлари бўйича фикр ва тажрибалари билан алмашишиб, ўз таклифларини билдиришди.