Амалиётчи ва тадқиқотчиларнинг талабалар билан учрашуви

Ҳуқуқни муҳофаза қилиш академияси вакиллари томонидан Наманган давлат университетида “Ҳуқуқни муҳофаза қилиш соҳасидаги олий таълимдан кейинги таълим институти” мавзусида давра суҳбати ташкил этилди.

Тадбир Академия томонидан Наманган вилоят прокуратураси ва Наманган давлат университети ҳамкорлигида ташкил этилди. Давра суҳбатида Академия, Наманган вилоят прокуратураси ходимлари ҳамда Наманган давлат университети юридик факультети профессор-ўқитувчилари, талабалари, магистрлари ҳамда тадқиқотчилари иштирок этдилар.

Тадбир иштирокчиларига олий таълимдан кейинги таълим институти фаолиятига оид қонун ҳужжатлари ижросини таъминлаш, Ҳуқуқни муҳофаза қилиш академиясида илмий тадқиқот ишларини олиб боришнинг аҳамияти ва яратилган шарт-шароитлар ҳақида маълумот берилди.

Академия мустақил изланувчилари орасида прокуратура органлари ходимлари салмоғи ортиб бораётганлиги, бу эса ўз навбатида илм-фан, таълим ва амалиёт интеграциясига хизмат қилаётганлиги алоҳида таъкидланди.

Очиқ мулоқот тарзида ўтказилган давра суҳбатида талабалар ўзларини қизиқтирган саволларга атрофлича жавоб олдилар.