Судларда прокурор ваколатини таъминлаш йўналиши бўйича навбатдаги малака ошириш курси бошланди

Ўзбекистон Республикаси Бош прокурори томонидан таълим жараёнининг прокуратура органлари касбий фаолияти билан узвий боғлиқлигини таъминлашга оид белгиланган вазифалар ижроси доирасида Бош прокуратура Академиясида прокуратура органларининг судларда прокурор ваколатини таъминлаш йўналишида хизмат фаолиятини олиб бораётган ходимларнинг навбатдаги гуруҳи учун модуль тизими асосида малака ошириш курси бошланди.

Ушбу малака ошириш курси тўлиқ масофавий таълим шаклида амалга оширилиб, мавзулар қайта алоқа механизми воситалари ёрдамида тингловчилар эҳтиёжларини инобатга олган ҳолда танланган.

Курс дастури прокуратура фаолиятининг умумий масалалари, шунингдек жиноят, фуқаролик, иқтисодий ва маъмурий ишлари бўйича судларда прокурор ваколатини таъминлаш масалаларига оид ўқув машғулотларидан таркиб топган бўлиб, ходимларнинг прокурорлик фаолиятининг ушбу йўналишларидаги назарий билим ва амалий кўникмаларини мустаҳкамлашга йўналтирилган.

Ўқув машғулотлари Академия профессор-ўқитувчилари томонидан прокурорлик амалиётига оид долзарб масалалар бўйича ишлаб чиқилган электрон шаклдаги мультимедиа ўқув материаллари асосида ўтказилади.

Малака ошириш курси ўқув дастурининг ўтказилиш тартиби ҳамда амалий топшириқларни бажариш қоидалари юзасидан тингловчиларга видеоконференцалоқа воситасида тушунтиришлар берилди. Тингловчиларнинг Академия билан узлуксиз алоқада бўлиш имкониятларини таъминлаш чоралари кўрилди.