Амир Темур таваллудининг 687 йиллигига бағишланган тадбир

Ўзбекистон Республикаси Ҳуқуқни муҳофаза қилиш академиясида 9 апрель – Амир Темур таваллудига 687 йил тўлиши муносабати билан “Соҳибқирон Амир Темур – буюк давлат арбоби, юксак маънавият соҳиби”  мавзусида маънавий-маърифий тадбир бўлиб ўтди.

Мазкур тадбир ҳуқуқни муҳофаза қилиш соҳасида етук малакали мутахассисларни тайёрлашда муҳим аҳамият касб этиб, тадбир давомида Буюк саркарда Амир Темурнинг ҳаёти, сиёсий ва ижтимоий фаолияти, темурийлар даври давлатчилиги, бошқарув тизими, давлат тизимини мустаҳкамлаш ва бошқаришдаги тартиб-интизом, қонунчилик ва суд-ҳуқуқ масалалари, фан, таълим ва маданият, савдо-сотиқ ва ҳунармандчиликни ривожланиши, мамлакат ҳимоясини таъминлаш борасида амалга оширган ишлар, умуман ўзбек миллий давлатчилиги тараққиётида темурийлар даврининг ўзига хос хусусиятлари ва аҳамияти ҳақида батафсил тушунча берилди.

Тадбир доирасида Ўзбекистон халқ ёзувчиси Мухаммад Али билан талабалар учрашуви ташкил этилиб, учрашув доирасида талабаларга адибнинг Амир Темур давлатчилиги ва темурийлар даври тарихига оид асарларининг яратилиши ва мазмун-моҳияти ҳақида маълумот берилди.

Учрашув давомида талабаларнинг адиб асарларида Амир Темур образининг тадрижий ўсиб бориши, унинг характеридаги адолатпарварлик, ҳалоллик, мардлик ва ватанпарварлик фазилатлари ҳақидаги тасаввурлари янада ортди.

Шунингдек, Ўзбекистон Жамоат хавфсизилиги университети профессори, т.ф.н. Жумавой Рахимов Амир Темур томонидан миллий юриспруденция соҳасида тамал тоши қўйилиши, Темур тузукларининг ижтимоий ва ҳуқуқий табиати, Амир Темурнинг дунё цивилизациясида тутган ўрни, унинг тарихий қахрамонликлари ҳақида, Тошкент давлат шарқшунослик институти профессори Адхамбек Олимбеков бадий адабиётларда Амир Темур сиймоси ҳақида батафсил маълумот берди.

Ўзбекистон Республикаси Ҳуқуқни муҳофаза қилиш академияси бошлиғининг ўринбосари ю.ф.д., профессор Музаффаржон Мамасиддиқов, Ўзбекистон Республикаси Бош прокуратураси бошқарма прокурори Ойбек Султонов прокуратура органларида кадрлар маънавий дунёқарашини оширишда Амир Темурнинг маънавий мероси, хусусан Темур тузукларининг беқиёс тутган ўрни ҳақида батафсил тўхталди.

Маънавий-маърифий тадбирда Темур тузукларининг мазмун-моҳияти ва аҳамияти ҳақида талабалар ўз фикр ва мулоҳазаларини билдирдилар. Амир Темур таваллудига бағишланган шеърлар айтилди, асарлардан парчалар келтирилди.

Мазкур маънавий-маърифий тадбир талабаларнинг ижтимоий-сиёсий ва маънавий дунёқарашини юксалтириш билан бир қаторда уларда буюк аждодларимизга бўлган юксак эҳтиром туйғуларини янада мустаҳкамлашга хизмат қилди.