“Иқтисодий жиноятларни молиявий тергов қилиш” мавзусида халқаро тренинг ўтказилди

Европа Кенгаши ва Европа Иттифоқи томонидан “Шаффофлик даражасини оширишга ва иқтисодий жиноятчиликка қарши курашишга кўмаклашиш” лойиҳаси доирасида Ўзбекистон Республикаси Ҳуқуқни муҳофаза қилиш академияси билан ҳамкорликда “Иқтисодий жиноятларни молиявий тергов қилиш” мавзусида Академия, Бош прокуратура, Иқтисодий жиноятларга қарши курашиш департаменти, ДХХ, ИИВ, ДБҚ ходимлари ва судьялар иштирокида тренинг ўтказилди.

Тренинг дастури доирасида молиявий тергов ўтказиш манбалари ва тезкор маълумотларнинг аҳамияти, молиявий тергов натижалари, тергов стратегиясини тузиш, молиявий тергов методлари, молиявий тергов ўтказишда идоралараро ҳамкорлик ўрнатиш, молиявий разведка бўлимлари ваколатлари, банк ва бошқа молиявий ташкилотлар томонидан маълумотларнинг ошкор қилиниши, далилларни баҳолаш, бунда махфий маълумотлардан фойдаланиш масалалари, халқаро ҳамкорликни амалга ошириш мавзулари бўйича назарий ва амалий-симуляцион машғулотлар (case study) ўтказилди.

Машғулотларда Европа Кенгаши экспертлари Арвиндер Самбей ва Даниэль Стайку ҳамда миллий экспертлар томонидан маъруза ва тақдимотлар қилинди. 

Тренинг ҳуқуқни муҳофаза қилувчи органлар ходимлари ҳамда судьяларнинг мазкур соҳада билим ва кўникмаларини оширишга хизмат қилади.