Қарши давлат университетида халқаро давра суҳбати ташкил этилди

Қарши давлат университетида “Одил судлов тизимини демократлаштиришнинг конституциявий асосларини такомиллаштириш – инсон ҳуқуқ ва эркинликларини таъминлашнинг энг муҳим омили" мавзусида халқаро давра суҳбати  ташкил этилди.

Тадбирда Судьялар олий кенгаши, Олий суд, Конституциявий суд, Адлия вазирлиги ва Бош прокуратура вакиллари, халқаро экспертлар, суд тизимининг масъуллари, фахрийлари ҳамда жамоатчилик вакиллари иштирок этди.

Тадбирда янгиланаётган Конституцияда одил судлов тизимини демократлаштириш борасида конституциявий асосларни такомиллаштириш, инсон ҳуқуқларини самарали ҳимоя қилиш, судлар мустақиллиги ва судьялар дахлсизлигини кучайтиришга билан боғлиқ киритилаётган янги нормалар ҳақида батафсил тушунтирилди.

Давра суҳбатида Ҳуқуқни муҳофаза қилиш академияси бошлиғининг ўринбосари, ю.ф.д., профессор М.Мамасиддиқов “Инсон шаъни, қадр-қиммати – олий қадриятдир!” мавзусида маъруза билан иштирок этди. Маърузада конституциявий ислоҳотларнинг зарурати, халқ конституцияси ва ижтимоий давлатнинг моҳияти, конституция лойиҳасидаги асосий янгиликларнинг  аҳамияти ва мазмунига алоҳида тўхталиб ўтди.

Тадбир ниҳоясида одил судловни амалга оширишдаги узоқ йиллар самарали фаолият кўрсатган нафақадаги судьяларга “Суд фахрийси” кўкрак нишони, тадбир иштирокчиларига Судьялар олий кенгашининг эсдалик совғалари топширилди.