Барқарор ривожланиш мақсадлари бўйича Ўзбекистоннинг иккинчи Ихтиёрий Миллий Ҳисоботи лойиҳаси муҳокамаси

Академияда Барқарор ривожланиш мақсадларининг “Самарали бошқарув” йўналиши бўйича Ўзбекистоннинг иккинчи Ихтиёрий Миллий Ҳисоботи лойиҳаси муҳокамаси ўтказилди.

Маълумот учун: Ҳуқуқни муҳофаза қилиш академияси Миллий барқарор ривожланиш мақсадларининг “Самарали бошқарув” йўналиши бўйича экспертлар гуруҳининг ишчи органи ҳисобланади.

Тадбирда “Самарали бошқарув” йўналиши бўйича экспертлар гуруҳи аъзолари, масъул вазирлик ва идоралар, БМТ ташкилотлари ва агентликлари, фуқаролик жамияти институтлари, мазкур йўналишда фаолият юритиб келаётган етакчи нодавлат нотижорат ташкилотлари вакиллари иштирок этдилар.

Тадбирни Бош прокурор ўринбосари, Миллий барқарор ривожланиш мақсадларининг “Самарали бошқарув” йўналиши бўйича экспертлар гуруҳи раиси С.И.Самадов кириш сўзи билан очиб, барқарор ривожланиш соҳасида қабул қилинган мажбуриятларни бажариш юзасидан белгиланган муҳим вазифалар ва кўрилаётган чора-тадбирларни қайд этиб ўтди.

Иштирокчилар тайёрланган ихтиёрий ҳисобот лойиҳасининг турли жиҳатларини муҳокама қилиб, унда белгиланган барча асосий вазифалалар, шу жумладан, зўравонликнинг олдини олиш ва гендер тенглигини таъминлаш, инсон ҳуқуқларини ҳимоя қилиш, қонун устуворлиги ва одил судловни таъминлаш, коррупцияга қарши курашиш ва ноқонуний молиявий оқимларни чеклаш масалалари бўйича фикр алмашдилар.

Экспертлар ҳисоботни қўшимча маълумотлар, шу жумладан, нодавлат сектори фаолияти нуқтаи назаридан ҳам тўлдириш зарурлигини таъкидлаб ўтдилар.

Муҳокама якунлари бўйича тақдим этилган ҳисобот лойиҳасида барқарор ривожланиш соҳасида амалга оширилаётган ислоҳотлар ва мавжуд муаммоларни тўлиқ акс эттириш бўйича аниқ вазифалар белгилаб олинди.