Коррупцияга қарши курашиш соҳасида ҳамкорлик янги босқичга кўтарилмоқда

Ўзбекистон Республикаси Президентининг 2020 йил 29 июндаги “Ўзбекистон Республикасида коррупцияга қарши курашиш тизимини такомиллаштириш бўйича қўшимча чора-тадбирлар тўғрисида”ги ПФ–6013-сонли ҳамда 2022 йил 28 ноябрдаги “Жиноятларни тергов қилиш соҳасида малакали кадрларни тайёрлашнинг сифат жиҳатидан янги тизимини жорий этиш тўғрисида”ги ПФ–257-сонли фармонлари билан Ҳуқуқни муҳофаза қилиш академияси ва Коррупцияга қарши курашиш агентлигига коррупцияга қарши курашиш бўйича бир қатор вазифалар юклатилган.

“Коррупцияга қарши курашиш тўғрисида”ги Қонун, Президент ҳужжатлари, коррупцияга қарши курашиш соҳасидаги давлат дастурлари ва бошқа ҳужжатларда белгиланган муштарак мақсадлар ва вазифалар ижросининг самарадорлигини ошириш мақсадида жорий йилнинг 6 июнь куни Ҳуқуқни муҳофаза қилиш академияси билан Коррупцияга қарши курашиш агентлиги ўртасида ўзаро ҳамкорлик меморандумини имзолаш маросими бўлиб ўтди.

Меморандумнинг асосий мақсади коррупциянинг олдини олиш ва унга қарши курашиш соҳасида ҳамкорликда илмий ва амалий тадқиқотлар олиб бориш, коррупция ҳолатининг тизимли таҳлилини амалга ошириш, бу соҳадаги ҳуқуқбузарликлар содир этилишининг сабаб ва шарт-шароитларини аниқлаш ва бартараф қилиш, аҳоли ва давлат хизматчиларининг ҳуқуқий онги ва ҳуқуқий маданиятини юксалтириш, жамиятда коррупцияга нисбатан муросасиз муносабатни шакллантириш, коррупцияга қарши таълим ва малака ошириш тизимини жорий қилиш, халқаро рейтингларда Ўзбекистон кўрсаткичларини яхшилаш учун саъй-ҳаракатларни бирлаштиришдан иборат.

Академия ва Агентлик ҳамкорлик меморандумига асосан БМТнинг Коррупцияга қарши конвенцияси қоидаларини, Иқтисодий ҳамкорлик ва тараққиёт ташкилоти Коррупцияга қарши тармоғининг Истанбул ҳаракатлар режаси тавсияларини миллий қонунчиликка сингдириш фаолиятини ривожлантиради, шунингдек ушбу Конвенция обзорларида ва ИҲТТнинг тавсиялари мониторингида Ўзбекистоннинг ижобий натижаларга эришишга қаратилган тадбирларни амалга оширади.

Тантанали руҳда ўтган маросимда Меморандумда белгиланган мақсад ва вазифаларга эришиш мақсадида тарафлар томонидан 2023 йилга мўлжалланган чора-тадбирлар режаси имзоланиб тасдиқланди.