ЯНГИ ЭЛЕКТРОН ДАСТУР ЖОРИЙ ҚИЛИНДИ

Жорий йилнинг 11 август куни Бош прокуратура Академияси томонидан Мажбурий ижро бюроси билан ҳамкорликда Бюро фаолиятида тизимли равишда юзага келаётган камчиликлар ва муаммоларнинг олдини олишга қаратилган видеоконференцалоқа режимида ўқув-семинари ўтказилди.

Тадбирда Бош прокуратура Академиясининг профессор-ўқитувчилари, Мажбурий ижро бюроси Марказий маҳкамаси ходимлари, Бюронинг барча вилоят ҳамда туман (шаҳар) суд ҳужжатлари ва бошқа органлар ҳужжатларини ижро этиш бўлимлари инспекторлари, давлат ижрочилари иштирок этдилар.

Ўқув-семинар давомида Бюро томонидан ишлаб чиқилган «MIB Portal» электрон дастури орқали ижро ҳаракатларини амалга оширишнинг самарадорлиги, алиментга оид ижро иш юритувининг ўзига хос хусусиятлари, ижро ҳужжатларининг ўз вақтида бажарилишини таъминлаш,  фаолиятида тизимли равишда йўл қўйилаётган камчилик ва юзага келаётган муаммоларнинг таҳлили, уларни бартараф этиш ва олдини олиш чораларини кўриш, шунингдек мавжуд илғор амалий тажрибаларни Бюро фаолиятида янада кенгроқ тарқатилиши масалалари муҳокама этилди.

Тадбир якунида ходимларга соҳага оид қонунчиликдаги ўзгаришлар ва янгиликлар мазмуни ҳақида батафсил тушунтириш берилиб, вилоят студияларида қатнашаётган иштирокчилар томонидан кўтарилган амалиётда юзага келаётган муаммолар юзасидан савол-жавоблар ўтказилди.