Ҳиндистон Криминалистика фанлари миллий университети билан ҳамкорлик

Ўзбекистон Республикаси Ҳуқуқни муҳофаза қилиш академиясида Тошкент давлат юридик университети билан ҳамкорликда Ҳиндистон Криминалистика фанлари миллий университети (National Forensic Sciencec University) вакиллари билан учрашув ўтказилди.

Ҳиндистонлик ҳамкасблар Криминалистика фанлари миллий университети, унинг фаолияти, тузилиши, киберхавфсизлик, тергов ва криминалистика соҳасидаги илмий салоҳияти ва йўналишлари тўғрисида маълумот беришди.

Ўз навбатида хорижий меҳмонлар Академия фаолияти, прокуратура ва тергов органлари ходимларини ўқитиш жараёни, таълимда қўлланилаётган янги педагогик усуллар ва замонавий технологиялар, ўқув инфраструктураси ҳамда профессор-ўқитувчилар ва тингловчиларга яратилган шароитлар билан таништирилди.

Конструктив руҳда ўтказилган тадбирда томонлар келгусида ўзаро ҳамкорликни назарда тутадиган битимни имзолаш чораларини кўришга келишиб олишди.